Шинэ төмөр зам юу болсон бэ?
Баянзүрхдүүрэг, 25 дугаархороо, ТөмөрзамынахмадинженерД.Дашзэвэг
Эрдэс баялаг, түүний дотор чулуун нүүрсээ экспортод гаргахын тулд төмөр замын шинэ сүлжээ байгуулах асуудлаар дээр доргүй олон жил ярьж, санаачилгатай зарим нэг нь төрийн өмчийн ба хувийн компани байгуулж, зураг төсөл судалгааг бишгүй хийгээд байх шиг. Гэтэл барилга байгууламжийн бодит ажил эхлэх, хөрөнгө мөнгөний асуудлыг шийдэх зорилт тулаад ирэхэд мухардалд орж, төрөөс гаргасан баримт бичгүүд нь зөрчилдөж, ашиг сонирхлын элдэв маргаан гарч байгаа бололтой. Уул уурхайн том нөөцийг ашиглах, ялангуяа бүтээгдэхүүнийг нь экспортлохын тулд эхлээд байгаль орчинд халгүй, эдийн засгийн үр ашигтай тээврийн дэд бүтцийг бий болгосон байх ёстой гэдэг. Үүнийг харгалзан төмөр замын шинэ шугам байгуулах дараахь төслүүдээр ТЭЗҮ хийжээ. Үүнд “Энержи Ресурсын төмөр зам” компани Германы ДБ Интернациональ гэдэг мэргэжлийн байгууллагаар Ухаа худаг-Гашуун сухайтын төмөр замын ТЭЗҮ хийлгэсээр багагүй хугацаа өнгөрч байна. Гэвч янз бүрийн саад тотгортой тулгарсаар өнөөг хүртэл барилгын ажил эхлээгүй. Гол шалтгаан нь тээврийн яамнаас баримталж байгаа бодлого, төмөр замын цариг, трассыг сонгохтой холбоотой болох нь сүүлийн үед тодорхой болж байх шиг байна.ТЭЗҮ-д тусгаснаар Гашуун сухайтын 1435 мм царигтай, 214.8 км урт төмөр зам нь 60 т/ум даацын зам төмөр, бетон дэртэй, 25 тонн голын даралттай, галт тэрэгний хөдөлгөөний автомат удирдлага ба мэдээллийн автоматжуулсан системээр тоноглосон, нүүрс тээвэрлэх зориулалттай зам байх ажээ. “Монголын төмөр зам” гэдэг төрийн өмчит компани үйл ажиллагаагаа эхэлснээс хойш багагүй хугацаа өнгөрчээ. Энэ хугацаанд тэд Маккензи гэдэг зөвлөх үйлчилгээний компаниар нэлээд өндөр өртөгтэй ТЭЗҮ хийлгэсэн гэж ярьж байна. Хоёр, гурван жилийн өмнө энэ компани нэг газар төмөр зам тавина гэж суваг ухуулж байгааг зурагтаар харуулж байсан. Чухам хаана тийм ажил хийснийг би хувьдаа мэдээгүй. ТЭЗҮ-ийнхээ дагуу хийсэн үү, эсвэл ТЭЗҮ-д зориулсан судалгаа байсан уу, бүү мэд. 2007 оны үед Улаанбаатар төмөр замын зураг төслийн товчоо МАК компанийн захиалгаар Өмнөговийн Нарийн сухайтаас Шивээ хүрэн хүртэл 47.5 км урт, 1435 мм царигтай төмөр зам барих ТЭЗҮ хийсэн боловч цаашид ажил үргэлжлээгүй. Тэр үед Хятадууд ТЭЗҮ, зураг төслийг нь хийж байсан Болд төмрийн төмөр зам аль хэдийнэ ашиглалтад орж төмрийн хүдрээ тээвэрлэж байна. 2007 онд Шарын голын уурхай АНУ-ын зөвлөх үйлчилгээний ТЕРРА Интернациональ компаниар Хар тэвшийн уурхайгаас 1520 мм царигтай 96 км төмөр зам тавьж Улаанбаатар төмөр замын Чойр өртөөнд холбох, Чойроос Замын-Үүд хүртэл гол замын хүчин чадлыг зохих хэмжээгээр нэмэгдүүлэх ТЭЗҮ хийлгэжээ. Санхүүгийн асуудлаас шалтгаалан төсөл хараахан хэрэгжээгүй байна.
Саяхан ерөнхий сайд асан М.Энхсайханы “Төмөр зам Түлхүүр ойлголт ба бодлогыг задлан шинжлэхүй” сэдвээр сэтгүүлчдэд танилцуулга хийсэн бичлэг болон мэдээллийн эх үүсвэрүүдээр гарч байгаа баримтуудаас үзвэл шинэ төмөр замыг тойрсон асуудал төр засгийн эрх мэдэлтнүүдийн дотор хэрүүлийн алим болж байна. М.Энхсайхан дарга МТЗ компанийн захирлаар богино хугацаанд ажилласан ч боловсролтой том сэхээтний хувьд ул суурьтай судалгаа, дүгнэлт хийжээ. Ялангуяа, хөрөнгө оруулалтыг үр ашгаа мөд өгөхгүй олон төрлийн ажилд үрэн таран хийхээс зайлсхийж богино хугацаанд хэрэгжих төсөлд зарцуулах, шинээр байгуулах төмөр замын цариг сонгох зэрэг оновчтой хувилбаруудыг дэвшүүлсэн байна. Тодорхой зориулалтаар хөрш улсын хил хүртэл тавих төмөр замын цариг нь нүүрс мэтийн нурмаг ачааг хил дээр шилжүүлэн ачилт хийхгүйгээр ачаатай вагоныг зориулалтын өртөө хүртэл шууд явуулах бололцоог хангасан, өөрөөр хэлбэл хүлээн авч байгаа төмөр замынхаа царигтай адил байх ёстой гэдэгтэй маргахын аргагүй. Ийм төмөр замыг ашиглахын тулд хөрш орныхоо засгийн газар, төмөр замтай гэрээ хэлэлцээр хийж, хилээр галт тэрэг нэвтрүүлэх, ачаа ба вагон дамжуулах зэрэг асуудлыг нарийвчлан тохирсон байх учиртай. Шинэ төмөр замын төслүүдээс Энержи Ресурсын төсөл л ТЭЗҮ, техникийн шийдэл нь бэлэн болсон, Таван толгойн нүүрсийг хамгийн дөт замаар, нэмэгдэл зардал, алдагдал багатай экспортлох зорилтыг шийдвэрлэж чадахаар байна. М.Энхсайхан дарга ч энэ төслийг суурь болгон авч “МТЗ өмнөд” гэдэг бас нэг компани байгуулан 232.8 сая ам.долларын хөрөнгө оруулж, бусад эх үүсвэрийг хөрөнгө оруулагчдаар гаргуулах хувилбарыг санал болгож байгаа бололтой. Уг нь Энержи Рессурс ч төмөр замын компани байгуулж, дээрээс төмөр зам барих зөвшөөрөл хүлээхийн зэрэгцээ барилга, ашиглалтын ажлын бэлтгэл хангахын тулд мэргэжлийн хүмүүсийг авч ажиллуулах, шинээр бэлтгэх, төмөр замын тээвэртэй холбоотой, манай улсын төмөр замд мөрддөг техникийн стандарт, заавар, галт тэрэгний хөдөлгөөний дүрэм, журмуудыг гадаад хэл рүү орчуулж түншүүдтэйгээ зөвшилцөх зэрэг ажил хийж байгаа юм билээ. Дээр дурьдсан мэдээлэлд дэвшүүлсэн техникийн шийдлийг дэмжихийн зэрэгцээ ярьж байгаа төсөл ба шинээр барих төмөр замд хамаагүй ч гэсэн судалгаанд Улаанбаатар төмөр замын талаар зарим буруу ташаа ойлголт, өнгөц дүгнэлт байгааг хэлэх нь зүйтэй гэж бодогдов. Тухайлбал, Улаанбаатар төмөр зам хоцрогдсон, галт тэрэг 37 км/цаг хурдтай мөлхөж явдаг. Түүнээс илүү хурдалбал гадас нь сугарна, рельс төмөр нь ачааллаа даахгүй гэжээ. Галт тэрэг 100 км/цаг хүртэл хурдалж байхад хадаас сугарсан, зам цөмрөөд уначихсан хачин зүйл хэзээ ч гараагүй. Төмөр зам бол нүсэр том систем, галт тэрэгний дундаж хурданд нөлөөлдөг газар зүйн нөхцөл, хөдөлгөөний нягтрал, өртөө зөрлөгийн тоо зэрэг хүчин зүйл байдаг. Үүнээс засч залруулж байгаа зүйл ч бий, болохгүй буюу асар их хөрөнгө хүч шаардсан зүйл ч бий. Сумдад цахилгаан төвлөрүүлтэд орж алсын удирдлагатай болоод бараг хагас зуун өнгөрчээ. “Төмөр замын хоцрогдлыг хэн ч хараагүй, хөндөж байгаагүй. Зөвхөн өнгөрсөн оны сүүлийн сард албан ёсны баримтад төмөр замыг сайжруулах хөтөлбөрийг хэрэгжүүлнэ гэдэг үг орсон” гэсэн байв. Улаанбаатар төмөр замын нэвтрүүлэх чадвар, хүчин чадал, хөдөлгөөний хурдыг дээшлүүлэх талаар төр засгаас ч, төмөр зам өөрөө ч, хувь нийлүүлэгчтэйгээ хамтраад олон төсөл хэрэгжүүлж, олон арга хэмжээ авсан. одоо ч авсаар байна. Тиймээс төмөр зам улс орныхоо тээврийн тасралтгүй өсөн нэмэгдэж байгаа хэрэгцээг ноцтой сааталгүйгээр хангасаар байгаа билээ. Зарим боломжийг алдсан явдал бий. Тухайлбал, хэдэн жилийн өмнө АНУ-ын Мянганы сорилтын сангийн томоохон хөрөнгө оруулалт дээгүүр шидэлцсэн чулуунд оногдож өөр тийшээ цацагдсан юм. Энэ бүхнийг нуршсаны учир төмөр замын холбогдолтой зорилтыг шийдвэрлэх, шинэ төслийг хэлэлцэхэд шийдвэр гаргах ба хэрэгжүүлэх төвшинд төмөр замын мэргэжилтэн байхгүй. Байсан ч тэднийг сонсдоггүй, асуудлыг мэргэжлийн бус хүмүүс бүдүүн баргийн таамгаар шийддэг болсныг хэлэх гэсэн юм. Одоо төмөр замын туршлагатай, олон шилдэг мэргэжилтэн янз бүрийн шалтгаанаар аар саар ажил хийж, зарим нь лааз өшиглөөд явж байна. Улаанбаатар төмөр замын даргын албыг олон жил хашсан Р.Рааш, В.Отгондэмбэрэл, орлогч дарга байсан доктор Ш.Сүхээ, МТЗ компанийг үүсгэн байгуулсан анхны захирал А.Батболд, Төмөр замын газрын дарга байсан Т.Батболд, тэнд ажиллаж байсан мэргэжлийн инженерүүд гээд тоочоод байвал нэг бус хэд хэдэн төсөл аваад явчих туршлагатай мэргэжилтнүүд байна. Монгол Улс ашигт малтмалын баялгаа ашиглаж цаашид хурдан хөгжих үү. Байгаль орчноо сүйтгэлгүй авч үлдэх үү. Их өр тавьж олсон хөрөнгийн эх үүсвэрээ аар саар зүйлд үрэн таран хийлгүй ашигтай зарцуулах уу гэсэн ноцтой асуудалтай холбоотой учир төр засгаас ухаалаг шийдвэр гаргаж шинэ төмөр зам байгуулах асуудлыг шуурхай, оновчтой шийдвэрлээсэй гэж хүсэн хүлээж байна.
URL: