“Бөхийн цол биш найрааг ярьцгаая”
Төрийн байгуулалтын байнгын хорооны өнгөрсөн баасан гаригийн хуралдаанаар Монгол Улсын 2012 оны төсвийн гүйцэтгэлийг батлах тухай, Монгол Улсын 2012 оны нэгдсэн төсвийн гүйцэтгэл, Засгийн газрын 2012 оны санхүүгийн нэгтгэсэн тайлангийн хоёр дахь хэлэлцүүлгийг хийж, Улсын Их Хурлын 2013 оны намрын ээлжит чуулганаар хэлэлцэх асуудлын тухай” Улсын Их Хурлын тогтоолын төслийг хэлэлцэхээр төлөвлөсөн байв. Харин хуралдаанаар хэлэлцэх асуудлыг танилцуулах үед гишүүн Р.Гончигдорж Үндэсний их баяр наадмын тухай хуульд нэмэлт, өөрчлөлт оруулах тухай хуулийн төслийг хэлэлцэх асуудлын дараалалд нэмж оруулах санал гаргасныг байнгын хорооны гишүүд дэмжсэн юм.
Тэрээр хуулийн төслийн талаар хийсэн танилцуулгадаа эдүгээ үндэсний бөхийн хөгжил өндөр төвшинд хүрч, өрсөлдөөн их болж байгааг дурдаад улсын баяр наадамд 1024 бөх барилдсан тохиолдолд арслан цолтой бөх ес давбал үзүүр түрүүний барилдааны өмнө түүнд аварга цол олгож, улмаар 10 давж түрүүлбэл улсын даян аварга цол олгох, түүнчлэн улсын баяр наадамд найм давж гурван удаа үзүүрлэсэн бөхөд арслан цол олгох, улсын далай аварга цолыг хасахаар тусгаснаа танилцуулав. Мөн хуулийн төсөлд арслан цолтой бөх хоёр удаа найм давж үзүүрлэсэн тохиолдолд аварга цол олгохоор тусгасан заалтыг хэлэлцүүлгийн шатанд засах боломжтой гэдгээ хэлсэн юм.
Төсөл санаачлагч гишүүн Р.Гончигдорж энэ хуулийн төсөл нь цөөн хэдэн хүнд зориулагдаагүй, харин залуу бөхчүүд, шинээр аварга, арслан цол хүртээд байгаа бөхчүүдэд цолоо ахиулах эрмэлзэл төрүүлэх, урам дэм өгөх, улмаар бөхийн найрааг арилгах ач холбогдолтой гэж үзэж буйгаа хэллээ. Мөн төсөл санаачлагчийн нэг Б.Болор төсөлд далай аварга цолыг хасахаар тусгасан. Нөгөө талаар наадамд түрүүлээгүй бол аварга цол олгохгүй гэж ойлгож болно. Иймээс хэлэлцүүлгийн шатанд энэ талаар анхаарч засах зүйл бий. Харин наадамд найм давж гурван удаа үзүүрлэнэ гэдэг бол асар их хүч, хөдөлмөр, нөгөө талаар ховор тохиолдол гэдгийг хэлсэн юм.
Гишүүн Б.Болор төсөлд түрүүлээгүй хүн аварга цол авахаар байгааг хэлэлцүүлгийн шатанд өөрчлөхөөр болсон гэдгээ хэлсэн юм. Харин гишүүн С.Дэмбэрэл төслийг бүхэлд нь дэмжих боломжгүй, эсрэг саналтай байна. Учир нь УИХ ийм хуулиар оролдож байгаа нь тун буруу юм. Нэгэнт бөхийн цол ярьж байгаа бол бөхийн найрааг яаж шийдэхээ бас ярьж тусгах ёстой. Уг нь энэ бол төрийн бус байгууллага өөрсдөө шийдээд явах эрх хэмжээний нь асуудал. 2003 онд үндэсний ёс заншлыг хуульчилснаас ийм буруу үр дагавар салахгүй байгаа гэж байлаа. Ингээд хуулийг төслийг хэлэлцэхийг гишүүдийн олонх нь дэмжсэн тул чуулганы нэгдсэн хуралдаанд оруулж хэлэлцүүлэхээр боллоо.
М.ЦЭЦЭГ /ЗУУНЫ МЭДЭЭ/
URL:
