Монголын авиакомпани олон улсын нээлттэй тендерт ялалт байгуулжээ

Монголын агаарын тээврийн “Томас Эйр” ХХК Энэтхэгийн Засгийн газраас зарласан олон улсын нээлттэй тендерт ялалт байгуулжээ.

Энэтхэг Улсын Засгийн газрын хэрэгжүүлэгч Агентлаг Survey India-аас өнгөрөгч нэгдүгээр сард зарласан Энэтхэгийн хойд бүс нутгийн бүтээн байгуулалтад зориулсан агаарын зураглалын ажлын дөрвөн шаттай тендерт дэлхийн 7 улсын 10 гаруй компани өрсөлдсөн байна. Австрали, Канад, Франц, Индонез, Испани, Монгол зэрэг орнын авиакомпани энэхүү тендерт өрсөлдсөнөөс Монголын 100%-ийн хөрөнгө оруулалттай “Томас Эйр” ХХК шалгарсан байна. Ийнхүү дотоодын авиакомпани дэлхийн өндөр хөгжилтэй улс орнуудтай мөр зэрэгцэн өндөр технологийн үйлчилгээний салбарт олон улсад өрсөлдөх чадвартай гэдэгээ нотолж чадсан байна.

2013 оны борооны улирлын үед Энэтхэгийн Уттаракханд мужийн дэд бүтэц болон хот байгуулалтад нэлээд хохирол учирсны улмаас Энэтхэгийн Засгийн газраас Гималайн нурууны урд хэсгээр хот байгуулалт, төмөр зам, хурдны замын нөхөн сэргээлт, бүтээн байгуулалтын томоохон төслийг хэрэгжүүлэхээр болжээ. Тиймээс олон улсын авиакомпаниудын дунд нээлттэй тендер зарласан бөгөөд Монголын “Томас Эйр” компани ялалт байгуулж чадсан байна. Энэ нь Монгол Улсын Иргэний нисэхийн салбараас хийж буй 2 дахь экспорт болж байгаа юм. Өмнө нь “МИАТ” ХК Бангладеш Улсад “Боинг” агаарын хөлгөө, нисэх багийн бүрэлдэхүүнтэй нь хамт түрээслүүлж, олон улсад Монголын иргэний агаарын тээврийн нэр хүндийг өргөж байсан юм. “Томас Эйр” ХХК бол бага оврын агаарын хөлөгтэй Монголын долоон авиа компанийн нэг юм. Тус компани 2011 онд байгуулагдаж өдгөө гурван агаарын хөлөгтэй үйл ажиллагаагаа явуулж байгаа бөгөөд HART aviation болон EASА-гийн шалгалтад тэнцсэн олон улсын стандартыг хангасан үйл ажиллагаа явуулж байгаа ажээ.


URL:

Сэтгэгдэл бичих