Тусгай зөвшөөрлөө хураалгасан 400 гаруй иргэд ажлаа хийж чадахгүй байна

Улсын Их Хурлын Өргөдлийн байнгын хороо хуралдан “Ашигт малтмалын газрын дарга асан Д.Батхуягийн буруутай үйл ажиллагаанаас ашигт малтмалын тусгай зөвшөөрөл нь хүчингүй болсон тусгай зөвшөөрлийг сэргээхийг хүссэн иргэдийн өргөдлийг хэлэлцэх” талаар тус байнгын хорооны дарга Р.Бурмаа танилцуулсан.

Иргэдийн өргөдлийг УИХ-ын гишүүн С.Одонтуяа, О.Содбилэг нар Өргөдлийн байнгын хорооны 2013 оны 11 дүгээр сарын 27-ны өдрийн 03 тоот тогтоолоор баталсан журамд заасны дагуу тухайн асуудлыг судлан санал, дүгнэлт боловсруулснаа хуралдаанаар танилцуулсан юм. Хууль зөрчиж олгосон хэмээн үзэж шүүхийн шийдвэрээр хүчингүй болсон ашигт малтмалын 106 тусгай зөвшөөрөлтэй холбоотой асуудлыг шийдвэрлэх зорилгоор байгуулагдсан ажлын хэсгийнхнээс байнгын хорооны гишүүд асуулт асуун, санал бодлоо солилцов. Хэлэлцэж буй асуудалтай холбогдуулан УИХ-ын гишүүн Ж.Батзандан, Д.Сарангэрэл, С.Одонтуяа нар Төрийн буруутай үйл ажиллагаанаас болж аж ахуй нэгж, иргэд хохирч болохгүй, төр хариуцлагаа хүлээх нь зүй ёсны хэрэг гэсэн байр суурьтай байгаагаа илэрхийлсэн:

Энэ удаагийн хуралдаанд Уул уурхайн яамны дэд сайд О.Эрдэнэбулган, Ашигт малтмалын газрын Төрийн захиргаа удирдлагын газрын дарга Н.Алтанцог болон албаны хүмүүс, “Ашигт малтмалын тусгай зөвшөөрөл эзэмшигч, хохирогч компаниудын холбоо”  ТББ-ын төлөөлөл оролцсон юм.

Хуралдааны үеэр ашигт малтмалын хайгуул хийх тусгай зөвшөөрлөө хураалгасан хохирогчдын өмгөөлөгч, хуульч нар тусгай зөвшөөрлийнх нь асуудлыг шийдэж өгөхийг хүсч, тухайн аж ахуйн нэгжүүд үйл ажиллагаагаа явуулж чадахгүй байгаагаас болоод 400 гаруй хүн ажлаа хийж чадахгүйд хүрээд байгаа талаар дурдсан юм.

Хуралдааны төгсгөлд байнгын хорооны дарга Р.Бурмаа хуралдаанд оролцогчид болон албаны хүмүүсийн санал дүгнэлтийг харгалзан үзэж байгаад ашигт малтмалын хайгуулын тусгай зөвшөөрөл олгох сонгон шалгаруулалттай холбоотой асуудлаар шийдвэрийн төсөл боловсруулж оруулж ирэхээ мэдэгдлээ.

П.Наран /ГЕОЛОГИ УУЛ УУРХАЙН МЭДЭЭ/