Нөхөн сэргээлт хийх нэрийдлээр алт олборлож, хууль зөрчжээ

527-14171463141fd23sfsfsdfГовь-Алтай аймгийн Есөнбулаг сумын Наран багийн “Ямаан ус” хэмээх газар өнгөрөгч наймдугаар сарын 15-ны өдрөөс эхлэн хэсэг бүлэг хүн нөхөн сэргээлт хийх нэрийдлээр гар аргаар алт олборлож эхэлсэн тухай нутгийн иргэд мэдээлж байгаа юм.

Иргэдийн хэлж буйгаар “Нийгмийн гэмт халдлагаас урьдчилан сэргийлэх төв” төрийн бус байгууллага нь тухайн бүс нутагт техникийн нөхөн сэргээлт хийхээр орон нутгийн удирдлагуудтай гэрээ байгуулсан боловч алт олборлож, байгаль орчныг сүйтгэх ажиллагаа явуулж байгааг нутгийн иргэд хатуу шүүмжилж байна.

Иргэдийн мэдээллийн мөрөөр МХЕГ-аас өнгөрсөн есдүгээр сарын 8-нд уг хууль бус ажиллагааг шалгаж, холбогдох хэд хэдэн хуулийн заалт зөрчсөн болохыг тогтоосон байна.

Тодруулбал, “Нийгмийн гэмт халдлагаас урьдчилан сэргийлэх төв” төрийн бус байгууллагын гүйцэтгэх захирлуудын өнгөрсөн наймдугаар сарын 15-ны өдрийн 01 тоот техникийн нөхөн сэргээлт хийх гэрээ нь “Ашигт малтмалын тухай хууль”, “Газрын хэвлийн тухай хууль”-ийг зөрчжээ.

Түүнчлэн үйл ажиллагаа явуулж буй талбай нь Засгийн газрын 2010 оны 308 дугаар тогтоолоор баталсан “Бичил уурхайгаар ашигт малтмал олборлох журам’’-ын дагуу зөвшөөрөл олгогдоогүй, нөхөн сэргээлт хийх хөрөнгийг бий болгох зорилгоор гар аргаар алт олборлосон газар гүйцээн олборлолт явуулж байгаа нь Ашигт малтмалын тухай хуулийн 7.3-ын Бичил уурхайгаар ашигт малтмал олборлохоос бусад тохиолдолд тусгай зөвшөөрөлгүигээр ашигт малтмал эрэх, хайх, ашиглахыг хориглоно,” гэсэн заалтыг зөрчиж байгааг холбогдох албаныхан тогтоожээ.

Тиймээс үйл ажиллагаа явуулах зөвшөөрлийг нь цуцлахыг Есөнбулаг сумын Засаг дарга М.Дашпунцагт үүрэг болгосон. Энэхүү шийдвэр гарснаас хойш гурван сар өнгөрч байгаа ч өнөөдрийг хүртэл орон нутгийн удирдлагуудын зүгээс арга хэмжээ авахгүй хууль бус үйл ажиллагааг өөгшүүлж байна.

Төрийн бус байгууллагын нэрээр тухайн бүс нутаг байгаль орчинг сүйтгэж, гол горхи ширгэхээс эхлээд хүн малд ноцтой хохирол учруулж байхад нутгийн удирдлагууд арга хэмжээ авахгүй байгаад иргэд бухимдалтай байна.

Хууль зөрчсөнийг нь тогтоож, гэрээгээ цуцлахыг шаардсан мэргэжлийн байгууллагынх нь албан бичиг байхад аймаг, сумын удирдлагууд үл тоож, хөдлөхгүй байгаа нь дээрх төрийн бус байгууллагатай тохиролцсон хэмээн хардахад хүргэж байна.

Ц.Анир

Эх сурвалж: Монголын үнэн


URL:

Сэтгэгдэл бичих