Манай цэргүүд Олон улсын тэмцээнээс цом хүртлээ

7ksassj6andj6skle2jsqdj2jr

ХБНГУ-ын Норд Райн Вестфален мужид  энэ сарын 20-нд  олон улсын цэргийн марш тактикийн аварга шалгаруулах 32 дугаар тэмцээн болжээ. Тэмцээнд Герман улсад суралцаж буй манай Зэвсэгт хүчний алба хаагчид амжилттай оролцжээ. ХБНГУ-ын Офицерын сургуулийн сонсогч ахлагч Л.Пүрэвсүрэн, дэд ахлагч М.Билгүүн, дэд ахлагч М.Бат-Орших, дэд ахлагч Б.Угтахбаяр нарын бүрэлдэхүүнтэй Монгол Улсын Зэвсэгт хүчний баг байнгын бие бүрэлдэхүүний ангилалд гуравдугаар байр эзэлж, цомоор шагнуулсан байна. Монгол Улсаас ХБНГУ-д суугаа ЭСЯ-ны Батлан хамгаалахын атташе дэд хурандаа Д.Эрдэнэбилэг Монгол цэргүүдээ оролцуулах ажлыг удирдан зохион байгуулжээ.

 

Тэмцээнд АНУ, БНФУ, ИБУИНВУ зэрэг есөн орны Зэвсэгт хүчин, хүчний бусад байгууллагын тус бүр дөрвөн хүний бүрэлдэхүүнтэй 29 баг оролцжээ. Норд Райн Вестфален муж улсын засаг захиргааны байгууллагын дэмжлэгтэйгээр тус муж улсын Цэргийн командлал, Бэлтгэл цэргийн холбооноос Зэвсэгт хүчний байнгын болон дайчилгааны бэлтгэл нөөцийн бүрэлдэхүүн, хүчний бусад байгууллага гэсэн ангиллаар өрсөлдөөн дунд явагджээ.

 

Тодруулбал, манай алба хаагчид 17 км газарт усан саад, шалган нэвтрүүлэх цэгийн хамгаалалт, халдлагад өртсөн хүмүүсийг аврах, эмнэлгийн анхан шатны тусламж үзүүлэх, гадаад орны цэргийн зэвсэг техник, дүрэмт хувцсыг таних, гал унтраах багаж хэрэгслийг ашиглах зэрэг нийт 17 сорилыг амжилттай  гүйцэтгэсэн байна.

 

Дашрамд сонирхуулахад, Бундесверт суралцаж буй Зэвсэгт хүчний цэргийн алба хаагчид  өнгөрсөн онд олон улсын цэргийн марш-тактикийн 28 дахь удаагийн тэмцээнд оролцож “Шилдэг баг” цомоор шагнуулж байсан юм.


URL:

Сэтгэгдэл бичих

АНХААРУУЛГА: Уншигчдын бичсэн сэтгэгдэлд FACT.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 9318-5050 утсаар хүлээн авна.