Улиастай-Гачуурт чиглэлийн зам хаалттай

Улиастай -Гачуурт чиглэлийн 11 км авто замын засвар шинэчлэлтийн ажлын хүрээнд суурь хучилт хийх, хоёр гүүрийн засварын ажлыг гүйцэтгэхийн тулд замыг хэсэгчлэн хаахаар болжээ. Тодруулбал, “Их хайрхан” амралтын газраас “Монгол шилтгээн” хүртэлх нэг км хуучин авто замыг өнгөрөгч долоодугаар сарын 30-ны 23:00 цагаас энэ сарын 5-ны өдрийн 06:00 цаг хүртэл зургаа хоног хаана.

Ингэхэд түр зам гаргах боломжгүй учир иргэд нэг км явган алхаж “Их хайрхан” амралтын газрын үүднээс нийтийн тээврийн автобусаар хот руу зорчино. Мөн “Монгол шилтгээн”-ээс Гачууртын эцсийн буудал хооронд нийтийн тээврийн автобус богино эргэлт хийж үйлчлэх юм байна.

Улиастай – Гачууртын 11 км авто замыг гэрээ ёсоор энэ сарын 30-нд хүлээлгэн өгөх ба одоогоор ажлын явц 44 хувьтай байна гэж Нийслэлийн Авто замын газраас мэдээлэв.