Намдаа жийгдэгсэд МАХН-ыг сонгоно
Өршөөлийн хууль батлагдах нь тодорхой болсон даруйд БНСУ-д эмчилгээ хийлгэж байсан экс Ерөнхийлөгч Н.Энхбаяр үтэр түргэн эх орондоо ирсэн билээ. Тэрбээр өөрийнх нь төлөө нойр, хоолгүй зүтгэсэн гэх УИХ-ын гишүүн Ц.Оюунбаатар, Э.Баянсэлэнгэ нарыг энэхүү хуулийг өргөн барьж, батлуулах тал дээр чамгүй зүтгэснийх нь төлөө Шадар сайд болон сайдын албан тушаалаар шагнав.
Юутай ч цаг хугацааны хувьд шинээр томилогдсон сайдууд ирэх жилийн УИХ-ын сонгууль болтол ажиллах нь тодорхой болжээ. Саяхан болтол сайдын албан тушаал хашиж байсан МАН-ын гишүүд 600 орчим намын гишүүнээ зургаан сар төр барилцах хугацаанд төрийн албанд тохоон томилж, улсын ажлыг хойш нь татаж байсан бол энэ жишиг дахин давтагдахгүй гэх газаргүй байна. МАХН-ын хувьд Засгийн газарт гишүүдээ шургуулсны хүчинд тодорхой хэмжээний санхүүжилтийг намдаа хийх нь ойлгомжтой бөгөөд үүний тулд МАН-аас томилогдсон нөхдийг гудамжинд гаргаж, тэдний оронд өөрийнхөө намын “шударга” гишүүдийг томилох нь гэсэн сэжиг АН-ынханд байгаа аж.
Нөгөөтэйгүүр, удахгүй ажилгүй болох гэж байгаа МАН-ын гишүүд төрийн ажлыг цалгардуулж байгаа нь нэгэнт халагдах нь тодорхой тул дэмий зүтгээд яахав дээ гэсэн бодолтой нь шуудхан холбоотой юм.
Харин энэ хооронд намын дарга Н.Энхбаяр зүгээр суусангүй. Тэрбээр өөрийн намаас сайд нарыг томилогдонгуут дараагийн алхмаа хийв. Ирэх жилийн сонгуулиас өмнө тус намд урьд өмнө хотын дарга байсан хоёр ч нөхөр гишүүнээр элсэж магадгүй болжээ. Тэд бол Г.Мөнхбаяр, Ц.Батбаяр нар юм.
Үүнээс гадна түүний үнэнч найз гэгдэх нэгэн үе Хан-Уул дүүргийн Засаг дарга байсан Д.Загджав, МАН-ын нарийн бичгийн дарга асан Ж.Сүхбаатар, намдаа хулхидуулсан “Нарантуул”-ын Ш.Сайхансамбуу нар нэгэнт МАН-аас сонгуульд нэр дэвших боломжгүй болсон тул нэр хүнд нь өсөж буй МАХН-д орж гишүүн болох мөрөөдлөө биелүүлэхээр шийдсэн бололтой.
Харин дээрх нөхдийн амбийц Н.Энхбаярт сайнаар эргэж, ирэх жилийн УИХ-ын сонгуулиар тус нам наймаас доошгүй гишүүнтэй болвол УИХ-д бүлэг байгуулж, өөрийн гэсэн дуу хоолойгоо өргөх боломж бүрдэх ажээ. Эх сурвалж www.wikimon.mn
URL:
