Хөгжлийн бэрхшээлтэй хүүхдүүд өдөр өнжүүлэх төвтэй боллоо
Хөгжлийн бэрхшээлтэй хүүхэдтэй эцэг, эхчүүд нэгдэж байгуулсан “Гэгээлэн” өдөр өнжүүлэх төв өнөөдөр нээлтээ хийлээ.
Уг төвийн зорилго нь хөгжлийн бэрхшээлтэй хүүхдийг хөгжүүлэх, нийгэмшүүлэх бөгөөд эцэг, эхчүүд хүүхэдтэй хамт байхын зэрэгцээ гар урлал, бэлэг дурсгалын зүйлс хийх, хөдөлмөр эрхлэх боломжоор хангагдаж байгаа ажээ.
“Гэгээлэн” ТББ-ын зохицуулагч Ё.Одгэрэл: Хөгжлийн бэрхшээлтэй хүүхэдтэй айлын эхнэр, нөхөр хоёрын нэг нь заавал хүүхдээ харж гэртээ байх болдог. Манай гэр бүл ч гэсэн тийм нөхцөл байдалд байсан.
Хөгжлийн бэрхшээлтэй хүүхдийг бусадтай харилцуулахгүй, нийгэмшүүлэхгүй бол маш хурдан ганцаардмал байдалд орчихдог. Тиймээс хүүхдүүдээ хөгжүүлэхийн төлөө нэгдэж, өдөр өнжүүлэх төвтэй болохоор зорьсон. Өнөөдөр өдөр өнжүүлэх төв маань албан ёсоор нээгдэж, гэртээ суухын оронд эцэг, эхчүүд хүүхдүүд маань нэг нэгнээсээ суралцаж, нэг хамт олон болж байгаадаа баяртай байна.
Миний хувьд хүүхдээ нийгэмшүүлэхийг байнга хичээдэг. Хүчин зүтгэлийн маань үр дүнд хүүхэд маань тусгай сургуулиас жирийн сургууль руу шилжсэн. Хөгжлийн бэрхшээлтэй хүүхэдтэй эцэг эхчүүддээ “Хүүхдээ битгий ганцаардуулж гэрт нь байлгаарай, өвчнийг нь эрт оношлуулж, олон нийттэй байнга харилцуулаарай, дэмжээд өгвөл хөгжлийн бэрхшээлтэй хүүхэд эрүүл хүүхэдтэй харьцуулахад бие даах чадвараараа илүү байдаг юм шүү” гэж хэлмээр байна.
Чингэлтэй дүүргийн 16, 17 дугаар хорооны хүүхдүүд хамрагдах уг өдөр өнжүүлэх төвийн байрыг дүүргийн ЗДТГ-аас гаргаж өгсөн байна. Түүнчлэн олон төрийн бус байгууллага, хувь хүмүүс тусалсан гэдгийг “Гэгээлэн” ТББ-ын тэргүүн Н.Цэрэннадмид хэлж байлаа.
Гэрэл зургийг Г.Өнөболд /mpa.mn/
URL:
