Огноо: 2011/9/21 21:02:43

МУГЖ цол нь хүндэдсэн гавьяатууд хаа байна МУГЖ цол нь хүндэдсэн гавьяатууд хаа байна

Хоёр дуу эвлэгхэн дуулчихвал СТА, нэг гайгүй шиг тоглолт хийчихвэл МУГЖ болдог ёс тогтсон гэлтэй. Саяхан баахан зохиолын дуучид МУГЖ хэмээх эрхэм хүндтэй байсан цолыг хүртсэн хэр нь нэр хүндийг нь унагаж орхив. Цөөн хэдэн гавьяатын талаар дурсая.

Ээнээгийн хүн чанар танигдаж эхэлжээ

Нэг хэсэгтээ Зохиолын дуучдын холбоог даргалж, удирдах ёстой хүний нэг хэмээн магтуулж, сөөнгөдүү хоолойгоороо олонд танигдаж байсан энэ залуу хоёр хүүхэдтэй эхнэрээ орхин хамтран дуулагчтайгаа нэг гэрт орлоо гээд л бөөн шуугиан тарьж, сэтгүүлчид нэг хэсэг Э.Оюумаа, Ч.Бат-Эрдэнэ нарын талаар бичиж байсан. Харин Ээнээ МУГЖ цол авсныхаа дараахан нь л зангаа хувиргаж, заяаны хань гээд байсан бүсгүйгээ орхижээ. Тэрбээр Э.Оюумаагаасаа салаад зогсохгүй өөрөө ч алга болсныг ард түмэн хэлж байна. Хааяахан цэнхэр дэлгэцнээ Ээнээгийн сөөнгөдүү хоолойг элэглэгч гаргаж байгаа харагдах юм даа. Гэхдээ Ээнээд гавьяатын цол нь хүндэдсэн ч хоёр хүүхэд ханьдаа эргээд очсон бол хүн чанартай залуу юм даа гэсэн үнэлгээг ард түмнээсээ авах биз ээ.

Кинонд урвасан гавьяат дуунаасаа хөндийрөв үү

Зохиолын дууны гүнж гэсэн тодотголтой нэг хэсэг бужигнуулж байхдаа олон хүнтэй нэр холбогдож, салж, салгаж байсан дуучин Т.Баясгалан УИХ-ын гишүүн, кёкүшюзан Д.Батбаяртай дэр нэгтгэснийхээ “шагнал”-д МУГЖ цолыг авсан гэж хүмүүс ярих юм. Уг нь хүн залуу байхдаа алдаж онолгүй л яах вэ. Гэхдээ л урлагийн акулуудын хүртэж чадалгүй хорвоог орхиж байсан энэ эрхэм хүндтэй шагналын нэр хүндийг бодмоорсон. Сүүлийн үед МУГЖ Т.Баясгалан төрийнхөө хайр хишиг, түмнийхээ итгэлийг нэг л буруу залаад байна уу даа хэмээн настайчууд ам уралдан ярихыг нэг биш удаа сонсов. Зохиолын дууны гүнж маань кино урлагт хөл тавьсан нь ийнхүү фэнүүдийг нь гомдоосон бололтой.

Тулгатай, живхтэй гавьяат тун чиг тогтворгүй байна

МУГЖ цол хүртэхдээ С.Жавхлан “Гавъяат цол надад зохиж байна уу гэж би бодсон. Самандын Жавхлан энэ цолоороо өөрийгөө чимэх биш харин гавъяат цолыг би чимж явах ёстой юм байна гэж ойлгосон. Тиймээс ард түмэндээ хандаад энэхүү эрхэм хүндтэй цолыг чимж явахаа хэлмээр байна” гэж хэлж байснаа нэг дурсаасай. Эр хүн туг ч барина, тугал ч хариулна гэдгийн үлгэрээр эхнэрээсээ салж, өөр бүсгүйтэй дэр нэгтгэсэн ч дахин салсан тухай таагүй мэдээллийн эзэн С.Жавхлан одоо харин улс төрөөр оролдож, тулга үүрч, туг мандуулахаар хөдөө орон нутгаар явж байгаа гээд сураг тасарсан. Энэ нь түүний нэр хүндийг, МУГЖ цолны нэр хүндтэй хамт унагаж орхилоо. Уг нь дуугаа дуулаад явбал сайн хүү юмсан гэж халаглах хүмүүс захаасаа аваад байгааг тулгатай, живхтэй, тун чиг тогтворгүй гавьяатад хүргэмээр байна.
Ер нь МУГЖ гэдэг эрхэм хүндтэй цол тэмдэг чинь та бүхнийг сайн хөдөлмөрлөж, олон арван жил дуу хоолойгоороо ард түмнээ баясган цэнгүүлж яваарай гэж өгсөн шагнал шүү дээ. Хэрвээ МУГЖ цолыг авчихаад буруу замаар будаа тээж байгаа бол цолыг нь хураадаг болмоор юм даа, эрхэм дарга нар минь.

Э.Мөнх

URL: