ИЗНН-ЫГ СОНГУУЛЬД ОРОЛЦУУЛАХААР БҮРТГЭСНИЙ АРД ХЭН БАЙГАА ВЭ

3a7081b2-6759-41e0-a4ca-2ceb3702ff89ИЗНН сонгуульд нэр дэвшигчдээ оролцуулахаар болж тус намыг СЕХ УИХ-ын ээлжит сонгуульд оруулахаар бүртгэж аваад байна. ИЗНН 5 хоногт багтан нэр дэвшигчдээ тодруулж, баримт бичгээ СЕХ-д хүргэх гэнэ. ИЗНН-ыг ийнхүү сонгуульд оролцуулахаар бүртгэж авсан нь цаагуураа учир шалтгаантай гэнэ.

Уг нь АН-ын удирдлагууд намаас нь угшилтай ИЗНН болон МҮАН-ыг өөрийн намдаа нэгдэхийг урьсан. АН угшил нэгтэй намуудаа нэгтгэхээс өөрөөр эвсэхгүй гэдгээ ч мэдэгдэж билээ. Мэдээж АН өөрийн намын саналыг хуваалгахгүй гэсэндээ тийнхүү жижиг намуудыг сонгуулийн өмнө булшлах санаа агуулсан нь энэ.

АН-ын энэ байр суурийг ИЗНН-ын дарга нар өөр өөр байр сууриар хүлээж авсан. ИЗНН-ын гурван даргын хоёр нь болох С.Оюун, С.Дэмбэрэл тэргүүтэй нэг хэсэг нь намаа татан буулгаж АН-д нэгдэх нь зүйтэй гэж үзсэн. Харин гурав дахь дарга нь болох Ц.Ганхуяг тэргүүтэй нөгөө хэсэг нь ИЗНН бусад намуудтай эвсэх нь зүйтэй гэдэгт хатуу байр суурьтай байв.

МҮАН ч ялгаагүй улстөрийн гуравдагч хүчний намуудтай хамтран “Их эвсэл” байгуулах санаачилга гаргасан. Тэр үед МҮАН, Эх-Орон намтай эхэлж яриад бусад намыг урьсан ч бүгд татгалзсан. ИЗНН ч олон намтай эвсэх асуудлаар яриад тохироонд хүрээгүй. Тиймээс эдгээр намууд АН-ыг сонгуульд дэмжихээ илэрхийлсэн.

Уг нь ИЗНН-аас 5 гишүүнээ АН-аас нэр дэвшүүлэхээр тохиролцсон гэдэг. Гэвч Ц.Ганхуяг үүнтэй эвлэрэхгүй, ИЗНН дангаараа сонгуульд оролцоно хэмээн аудитад сонгуульд оролцох мөрийн хөтөлбөрөө хянуулж СЕХ-нд өргөн барьсан билээ. Харин СЕХ тус намыг бичиг баримтын зөрчилтэй хэмээн бүртгэж аваагүй юм. Мөн намууд нэр дэвшигчдээ зарлахын өмнө АН ИЗНН-аас 5 биш 3 хүнийг нэр дэвшүүлнэ гэж мэдээлсэн. Тэгээд яг дэвшүүлэхдээ С.Дэмбэрэл, Р.Булгамаа нарыг л нэр дэвшүүлсэн юм.

Энэ хооронд С.Оюун “Ц.Ганхуяг бид хоёр сонгуульд нэр дэвшихгүй” гэж байлаа. Харин Ц.Ганхуяг үүнийг эсэргүүцэн ИЗНН-ынхаа буурийг сахигч бусад нөхдийн хамт шүүхэд СЕХ-г өгч, улмаар Ерөнхийлөгч Ц.Элбэгдоржид хандсан. Ц.Ганхуягийн хувьд 1990-ээд онд Ерөнхийлөгчийн хамт нэгэн холбоо байгуулж хамтран ажиллаж явсан хүн билээ. Энэ нь ч түүнд хандсан нэг шалтгаан болохыг тэр өөрөө хэлсэн.

Ингэсээр 5 дугаар сарын 30-ны өдөр болсон УДШ-ийн хурлаар ИЗНН-ыг сонгуульд оролцуулахаар бүртгэхийг СЕХ-нд даалгасан шийдвэр гаргасан юм. Ингээд бүртгэгдсэн тэд өнөө маргаашгүй нэр дэвшигчдээ тодруулж СЕХ-нд батламжлуулахаар боллоо.

Харин тэднийг сонгуульд оролцохоор бүртгүүлсэн энэхүү шүүхийн шийдвэрийг Ерөнхийлөгчтэй холбоотой хэмээн хардах хүн олон байгаа аж. Сүүлийн жилүүдэд УИХ-ын даргатай болон хуучин найз Х.Баттулгатайгаа ил, далд тэмцэлдэх болсон гэгддэг Ерөнхийлөгчийн хувьд АН-ын саналыг хуваах улстөрийн хүчинд дэмжлэг үзүүлж болох талтай. Үнэхээр З.Энхболдыг намыг нь ялагдуулж байж л хэн ч биш болгох боломжтой гэж үзэгсэд нам дотор нь ч олон байгаа нь ийм таамгийг дэвшүүлэхэд хүргэж байна.

Одоогийн Ерөнхийлөгч Ц.Элбэгдорж ирэх жил албанаасаа бууна. Тэр үедээ нам доторхи “дайснуудаа” дарсан байхгүй бол араас нь амар заяа үзүүлэхгүй байх ч магадлалтай. Ер нь ч Ерөнхийлөгч нарын “дайснууд” нам дотор нь л байдаг.

Энэ утгаараа З.Энхболд, түүний нөхдийг дарахын тулд ИЗНН-ыг сонгуульд оролцуулах асуудалд Ерөнхийлөгчийг нөлөөлсөн гэх яриа байна.

Г.Самбаа /GEREG.MN/

 


URL:

Нэр: Ж Огноо: 4 June 2016

Оюун бол болих хэрэгтэй шдээ ахаасаа урваж яаж чадаж байнаа.зүгээр л мэргэжлээрээ ажиллана биздээ.изн д голдуу зоригын дэмжигч нар баыгаа шдээ.турж үхэх арай л болоогүй баймаар юм.нөхөр нь ичдэггүй юм байхдаа эхнэрээ зарж идэхээс…

Сэтгэгдэл бичих

АНХААРУУЛГА: Уншигчдын бичсэн сэтгэгдэлд FACT.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 9318-5050 утсаар хүлээн авна.