Ю.Цэдэнбал даргаар шоудагч Ч.Хүрэлбаатар хэлсэндээ хүрэх үү?

Увсаас сонгогдсон УИХ-ын гишүүн Ч.Хүрэлбаатар, “Хурд” группын босс Б.Чойжилсүрэн нар нэг хэсэгтээ л амь нэгтэй салж хагацахгүй явж, УИХ-д удаа дараа сонгогдож байсан билээ. Тэгвэл саяхан болж өнгөрсөн сонгуулийн үр дүнд МАН дийлэнх олонхи болж, Ч.Хүрэлбаатар гишүүн Сангийн сайд болох гэж санаархсан авч түүнийг УИХ-ын Төсвийн байнгын хороо­ны даргаар томилж дэвшүүлэн зай­луул­сан юм. Энэ бүхэнд тэрбээр ихэд хорсож Сангийн сайд болсон Б.Чойжил­сүрэн­гээсээ зайгаа барьжээ.

Сонгууль болохоос өмнө түүнийг ах, дүү нартайгаа нийлж Хотгор шанагын уурхайн 51 хувийг солонгос­чуудад зарсан тухай мэдээлэл ца­цаг­даж байсан билээ. Чингэхдээ Ч.Хүрэлбаатар нь Бөхмөрөн сумын Хотгор шанагын нүүрсний ордын 51 хувийг 10 сая доллараар Солонгосын төрийн өмчит компани болох Korea Mongolia Energe Devlopment ком­панид зарсан ноцтой баримт дэлгэгдсэн. Харин уг гэрээн дээр Ч.Хүрэлбаатарын нэр байхгүй хэдий ч түүний төрсөн ах Ч.Гантулга, дотны найз Б.Дэмбэрэл нарын хувийн данс руу мөнгө шилжүүлэн авсан нь баримтаар батлагджээ. Энэхүү нүүрсний бүлэг ордыг анх улсын төс­вөөр хайгуул хийж, 1.3 тэрбумын нөөцтэй болохыг нь тогтоосон байдаг. Гэвч Ч.Хүрэлбаатар нар дээрх стра­тегийн ордод бусдыг оруулахгүй байх талаас нь бүхий л арга хэмжээг авч тухайн ордыг ердөө 68 сая тонны нөөцтэй хэмээн тогтоолгожээ. Нэгэн цагт Түлш, эрчим хүчний сайдаар ажиллаж байсан Ч.Хүрэлбаатарын хувьд ганц ордын нөөцийг дарахад ямар ч асуудалгүй байсан бололтой. Одоогоор энэ хэрэг таг чиг байгаа юм.

2016 оны сонгуульд нутгаасаа нэр дэвшихийн тулд ирэх есдүгээр сарын 20-нд тохиох Ю.Цэдэнбал даргын 100 жилийн ойг тэмдэглэх талаар УИХ-д санал оруулсан ч тухайн үед засаг барьж байсан АН-ын дарга, УИХ-ын дарга З.Энхболд түүний овжин залийг мэдмэгцээ уг асууд­лыг өндөр авахуулалгүй хав дарж чадсан юм.

Харин сонгуулийн сурталчил­гааны үеэр Х.Баянмөнх аваргын хамт З.Энхболд дарга Увс аймгийн Улаангом сумд хүрэлцэн очиж сон­гогч түмэнтэй уулзах үеэрээ Ю.Цэдэнбал даргын 100 насны ойг ёслол төгөлдөр тэмдэглэхээр бол­сон тухайгаа танилцуулахад Ч.Хүрэлбаатарын үнэнч албатууд УИХ-ын даргын өөдөөс эсэргүүцэл илэрхийлж, улмаар дээрх уулзалтыг бу­жигнуулж, тараахад хүргэсэн би­лээ. Ийнхүү улс төрийн тоглолтыг Ч.Хүрэлбаатар гишүүн, АН-ын дарга З.Энхболд нарын хэн нь ч өөртөө ашигтайгаар эргүүлэх гээд барсангүй.

Харин одоогоор Ю.Цэдэнбалын академийн гишүүд мар­шалын 100 насны ойд зориулсан шүлэг, нийтлэлийн уралдаан зарла­сан төдийхнөөс харахад энэхүү түүхэн хүний мэндэлсэн өдрийг төр, засгийн зүгээс дорвитой анхаарч тэмдэглэх эсэх нь тодорхойгүй бай­гаа юм. Ю.Цэдэнбал даргын хүү Ц.Зориг өдгөө Москвад ажиллаж, амь­дарч байгаа билээ. Тэрбээр ойрын үед Монгол Улсаас ОХУ-д суугаа Элчин сайд Б.Дэлгэрмаатай уулзаж, эцгийнхээ 100 насны ойг тэмдэглэх талаар санал бодлоо солилцох хүсэлтэй байгаа аж. Ингээд зогсохгүй Ю.Цэдэнбал даргын 100 нас­ны ойгоор Улаанбаатарт очиж ах, дүү, хамаатан садантайгаа уул­захаас гадна эцгийнхээ ойн арга хэм­жээнд оролцохоор төлөвлөжээ.

Ийн­хүү улс төрийн намуудын бас нэг шоуны бай болсон Бал даргын 100 насны ой хэрхэн болж өнгөрөх нь цагтаа түүний 44 жил удирдаж асан, өдгөө засгийн эрх барьж буй МАН-ын удирдлагуудаас шалтгаалахаар болжээ.

Эх сурвалж www.wikimon.mn