Хөнжил сөхөхөөс өөр ажил цагдаа нарт бий
Саяхан зочид буудлуудаар цагдаа нар “зочилж” байгааг телевизээр гаргаж байна. Буудалд орж үйлчлүүлж байгаа хүмүүсийг ор хөнжлийн ажил хийлээ, архи уулаа гэж шалгаж байгаа нь тэр юм байх.
Нийгмийн хэв журам зөрчсөн бол одоо яая гэхэв. Гэтэл буудалд орж наргиж цэнгэснийх нь төлөө гэмт хэрэгтэн аятай эрхэнд нь халдаж, хөнжлийг нь сөхөх нь дэндүү эрээ цээргүй үйлдэл юм. Хайр сэтгэлтэй хос шөнийг өнгөрөөж байвал тэр бас гэмт хэрэг болох юм байна л даа. Тэгээд ч ууж, наргих, унтаж хэвтэх нь хувь хүний эрхийн асуудал. Цагдаа нар ч, тэр ажиллагааг сурвалжилж яваа сэтгүүлч ч ертөнцийн ёсноос гажаагүй бол секс хийдэг гэдэгт зуун хувь итгэлтэй байна.
Хоёр оюутан залуу архи уугаад тасарчихаж. Тэднийг мөн л гэмт хэрэгтэн шиг чичилж байх аж. Буудлын эзэн ч гэсэн өөрийнх нь хувийн өмчид дур зоргоороо нэвтэрч байгаа хүмүүсийг өөгшүүлэн үйлчлүүлэгчийнхээ эрхэнд халдуулаад зогсох нь зүйд нийцэхгүй юм. Үйлчлүүлэгч хаан л юм бол буудлын эзэн тэр хүмүүсийн эрхийг хамгаалах ёстой. Ингэж цагдаа нарыг дураар нь дургиулаад байвал тэр буудалд хэн очиж үйлчлүүлэх юм бэ. Хэдийгээр архидалт, янхандалт нь зөв зүйл биш ч нийгэмд байж л байдаг үзэгдэл. Бусдад гай болохгүй бол өөрийнхөө мөнгөөр архиа авч буудалдаа орно уу, өөрийнхөө биеийг үнэлнэ үү хэнд падтай юм. Дэлхийн ямар ч хөгжилтэй оронд биеэ үнэлэгч байж л байдаг. Эрэлт нь байгаа болохоор нийлүүлэгч байж байгаа хэрэг.
Сэтгүүлч бид гэмт хэрэгтнүүдийг цагдаагаас дутахгүй сурвалжлаад баримттай нь гаргаж тавиад байхад очоод барьчихаж дөнгөхгүй хэрнээ хөнжил сөхөх ажилд яасан гаргуун байх юм. Эрхэм цагдаа нар аа, хүний хөнжил битгий сөхөж бай, муухай ш дээ.
Д.МӨНГӨНДАЛАЙ
udriin sonin
URL: