Туркэд суугаа ОХУ-ын Элчин сайдыг буудан хөнөөжээ

14821953275858817f45845АНКАРА./TASS/. ОХУ-аас Туркэд суугаа Элчин сайдыг нийслэл Анкара хотод 22 настай Мевлют Мерт Алтинтас гэдэг цагдаа буудан  хөнөөсөн гэж Турк улсын  Дотоод хэргийн сайд Сулейман Сойлу мэдэгдлээ.

Элчин сайд Андрей Карлов даваа гарагт уран зургийн галерейд гэрэл зургийн үзэсгэлэнгийн нээлтийн ёслолд оролцоон үг хэлж байх үед гэмт этгээд түүнийг араас нь бууджээ. Гэмт этгээд тухайн үед костюм, зангиатай байжээ.

Цагдаа нар гэмт этгээдийг хэргийн газарт буудан устгасан байна. Атлинтас 2.5 жилийн өмнөөс Туркийн нийслэл Анкара хотын цагдаагийн газарт ажиллаж эхэлсэн гэж сайд Сойлу хэлэв.

Атлинтас 1994 оны зургадугаар сарын 24-нд Туркийн баруун нутгийн Айдын мужид төржээ.

Чухам ямар шалтгаанаар Элчин сайдын амь насыг бүрэлгэснийг цагдаа нар тогтоохоор ажиллаж байна гэж Дотоод хэргийн сайд хэллээ.

Халдлага болсон газрын хяналтын камерт буусан дүрс бичлэгээс үзвэл, гэмт этгээд Элчин сайдыг буудсаныхаа дараа “Алеппог мартаж болохгүй! Сирийг мартаж болохгүй!” гэж хашгирч байв. Мөн тэрбээр “Бурхан бол агуу” гэж арабаар хашгирч байжээ.

Алеппо хот өнгөрсөн долоо хоногийг хүртэл Сирийн сөрөг хүчний гол түшиц газар байсан юм. Оросын армийн дэмжлэгтэйгээр Сирийн засгийн газрын цэргүүд тус хотыг өнгөрсөн долоо хоногт бараг бүрэн чөлөөлсөн билээ.

Андрей Геннадьевич Карлов 1954 онд Москва хотод төрсөн бөгөөд 2013 оны долдугаар сараас хойш Туркэд суугаа ОХУ-ын Элчин сайдаар ажиллаж байжээ.

Г.Доржханд МОНЦАМЭ


URL:

Сэтгэгдэл бичих

АНХААРУУЛГА: Уншигчдын бичсэн сэтгэгдэлд FACT.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 9318-5050 утсаар хүлээн авна.