“Төв цэвэрлэх байгууламжийн санхүүжилтийг шийдэх боломжгүй. Гэхдээ гарц хайя”

11562

Мянганы сорилтын корпорацийн Монголыг хариуцсан ахлагчаар Жей Шир томилогджээ.

БОАЖ-ын сайдын үүрэг гүйцэтгэгч Д.Оюунхорол түүнийг өчигдөр хүлээн авч уулзсан байна.

Тус корпораци нь Монгол Улсын Засгийн газартай гэрээ байгуулан цэвэрлэх байгууламжаас гарч буй буй бохир усыг цэвэршүүлэх замаар дулааны цахилгаан станциудад нийлүүлж, дахин ашиглах ажлыг эхлүүлэхээр тохироод байгаа юм.

Мянганы сорилтын корпорацийн Монголыг хариуцсан ахлагчаар шинээр томилогдсон Жей Шир нь энэ төрлийн гэрээ байгуулан, амжилттай хэрэгжүүлж байсан туршлагатай гэдгийг энэ үеэр онцлоод Монголтой байгуулах II шатны компакт гэрээг амжилттай урагшлуулна гэдэгт итгэлтэй байгаагаа тус корпорацийн төлөөлөл дуулгасан юм.

БОАЖ-ын сайдын үүрэг гүйцэтгэгч Д.Оюунхорол цаашдын хамтын ажиллагаа амжилттай үргэлжилнэ гэдэгт итгэлтэй байгаагаа мөн онцлоод юун түрүүнд шийдэх хэд хэдэн асуудал байгааг танилцууллаа. Тэрбээр “Улаанбаатар хотын төв цэвэрлэх байгууламжаас гарч буй усыг цэвэршүүлэн дулааны цахилгаан станциудад нийлүүлэх гол зорилго бүхий бидний хамтран хэрэгжүүлэхээр бэлтгэл ажлаа хангаж буй төслийг хэрэгжүүлэхэд асуудал тулгарсан.

Монголын төр засгийн тогтворгүй байдлаас болж төв цэвэрлэх байгууламжийг шинэчлэн барихаар ТЭЗҮ-ээ боловсруулан бэлтгэл ажилдаа ороод байсан компанийн ажил цуцлагдлаа. Энэ нөхцөл байдлаас шалтгаалаад бидний хамтран хэрэгжүүлэхээр төлөвлөсөн төсөл ч  үр дүнгүй болох эрсдэл үүсээд байна. Тиймээс би та бүхнээс хамтарч хэрэгжүүлж байгаа төслөө үр дүнд хүргэхийн төлөө төв цэвэрлэх байгууламжийг шинээр барихад шаардлагатай 300 сая ам.долларын санхжүүжилтийн асуудлыг шийдэх гарц хайх хэрэгтэй болов уу гэж бодож байна” хэмээсэн юм.

ТӨВ ЦЭВЭРЛЭХ БАЙГУУЛАМЖИЙН САНХҮҮЖИЛТИЙН АСУУДЛЫГ ШИЙДЭХ БОЛОМЖГҮЙ

Мянганы сорилтын корпорацийн Монголыг хариуцсан ахлагч Жей Шир “Мянганы сорилтын корпорацийн хувьд II шатны компакт гэрээнд гарын үсэг зурсны дараа хэрэгжих төсөлд зориулж 350 сая ам.долларын зээлийг олгохоор болсон учир төв цэвэрлэх байгууламжийн санхүүжилтийн асуудлыг шийдэх боломжгүй.

Гэхдээ анхнаасаа төв цэвэрлэх байгууламжаас гарч буй бохирыг цэвэршүүлж, дулааны цахилгаан станцид нийлүүлэх замаар Улаанбаатарын усны хангамжийг сайжруулах зорилготойгоор танай яамтай хамтран хэрэгжүүлэхээр төлөвлөсөн төслөө үр дүнтэй болгохын төв цэвэрлэх байгууламжийг шинэчлэхэд шаардлагатай санхүүжилтийг Монгол Улсын Засгийн газартай хамтран хандивлагч орнуудаас олох боломжийг судалж, гарц хайхад татгалзах зүйлгүй. Үүний тулд бидний цаашдын хамтын ажиллагаа, танай яамны үүрэг чухал гэдгийг онцлох хэрэгтэй” хэмээлээ.

Уулзалтын төгсгөлд БОАЖ-ын сайдын үүрэг гүйцэтгэгч Д.Оюунхорол Мянганы сорилтын корпорацийн тусламжтайгаар төв цэвэрлэх байгууламжийг шинэчлэх санхүүжилтийн асуудлыг шийдэх гарц хайхаар болсонд талархал илэрхийлээд Засгийн газар болон холбогдох газруудад танилцуулна гэдгээ хэллээ.

Эх сурвалж: БОАЖЯ


URL:

Сэтгэгдэл бичих

АНХААРУУЛГА: Уншигчдын бичсэн сэтгэгдэлд FACT.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 9318-5050 утсаар хүлээн авна.