Сэргээн засах төвийг cэргээх шаардлага

527-151001710811-7-6-550x300Монголын төр хөгжлийн бэрхшээлтэй хүүхдүүдээс нүүр буруулжээ. Өдөр тутмын асаргаанаас эхлээд үйлдэл бүртээ хүний гар хардаг тэдэнд булчин суллах, бариа засал гээд олон төрлийн эмчилгээ сувилгаа шаардлагатай. Цаашлаад хөдөлгөөн, сэтгэл засал, цахилгаан, усан эмчилгээ зэргээр 7-8 төрлийн төрөлжсөн эмчилгээ хийлгэх ёстой аж.  Гэтэл саяхныг хүртэл дээрх эмчилгээ сувилгааг үнэ төлбөргүй, дараалалгүй үзүүлж байсан Сэргээн засах хөгжлийн төвийг татан буулгаж, түүгээр үйлчлүүлж байсан  хөгжлийн бэрхшээлтэй хүүхдүүдийг хөсөр хаяжээ.Энэ төвөөр дан ганц хөгжлийн бэрхшээлтэй биш сульдаа, бронхит, саажилттай хүүхдүүд ч эмчлүүлж байсан юм.  Сэргээн засах хөгжлийн төвд нийслэлийн бүх асрамж халамжийн газар, дүүргийн хөгжлийн бэрхшээлтэй хүүхдүүд очиж үйлчлүүлдэг байсан бол тус төвийг Гэр бүл хүүхэд залуучуудын хөгжлийн газрын даргын шийдвэрээр энэ оны эхээр татан буулгаж оронд нь Хүүхдийн тусламжийн 108 төвийг оруулсан байна.Ийнхүү хөгжлийн бэрхшээлтэй хүүхдэд зориулсан улсдаа ганц төвийн тоног төхөөрөмжийг Өнөр бүл төвд шилжүүлсэн байна.

СЭРГЭЭН ЗАСАХ ЭМЧИЛГЭЭНИЙ ТОНОГ ТӨХӨӨРӨМЖҮҮД “ӨНӨР БҮЛ” ТӨВД ХАДГАЛАГДАЖ БАЙНА
Сэргээн засах хөгжлийн төвөөр  Хүүхэд залуучуудын сургалт хүмүүжлийн тусгай цогцолбор, Цөлийн сарнай, Альфа, Хүүхдийн Солонго төв, Хүүхдийг ивээх сан, Энэрэлийн түүчээ, Тайваны хүүхэд гэр бүлийг дэмжих сан болон Баянзүрх дүүргийн 200 гаруй хөгжлийн бэрхшээлтэй хүүхдүүд үйлчлүүлж байжээ. Тэдгээр хүүхдүүдэд сэргээн засах эмчилгээнүүд болох хөдөлгөөн засал, эмчилгээний биеийн тамир, цахилгаан эмчилгээ, парафин, усан эмчилгээ, халуун жин засал, татлага хийнэ. Мөн  уламжлалт анагаах ухааны эмчилгээнээс их бие, чих, гарын зүү, төөнүүр, бариа засал, сэтгэл засал, нийгмийн ажлын үйлчилгээ зэрэг цогц эмчилгээ үйлчилгээ хийж байжээ. Харин одоо эдгээр чухал, ховор тоног төхөөрөмжийг Өнөр бүл төв нэгдүгээр давхартаа хадгалж байгаа юм. Ийнхүү үйл ажиллагаа нь хумигдсанаар зөвхөн Өнөр бүлийн хүүхдүүд тоног төхөөрөмжийг ашиглаж байгаа юм. Өөрөөр хэлбэл, хөгжлийн бэрхшээлтэй олон зуун хүүхдүүдэд нэн шаардлагатай тоног төхөөрөмжөөр Өнөр бүлийн цөөхөн хүүхэд үйлчлүүлж, тус төвд сул хадгалж байна гэхэд хилсдэхгүй боллоо.
ХӨГЖЛИЙН БЭРХШЭЭЛТЭЙ ХҮҮХЭД ДАСГАЛ ХИЙХГҮЙ УДВАЛ ҮЕ МӨЧНИЙ БУРУУ ХЭЛБЭРТЭЙ БОЛНО
Хөгжлийн бэрхшээлтэй олон зуун хүүхдүүдэд нэн шаардлагатай тоног төхөөрөмжөөр Өнөр бүлийн цөөхөн хүүхэд үйлчлүүлж, тус төвд сул хадгалж байна гэхэд хилсдэхгүй боллоо.
Бид тоног төхөөрөмж нь шилжсэн Өнөр бүл төвийн захирал М.Өлзийчимэгтэй холбогдоход “Манайх одоо зөвхөн төвийн хүүхдүүддээ сэргээн засах эмчилгээ хийж байгаа. Өөр хүүхдүүдэд үйлчилгээ үзүүлэх зай талбай боломж нөхцөл байхгүй. Харин гэрээний дагуу Тайванийг ивээх сангийн хүүхдүүдэд хуваариар үйлчлэхээр болсон” гэлээ.
Хөгжлийн бэрхшээлтэй хүүхдүүдэд үзүүлэх сэргээн засах эмчилгээний талаар тус төвийн эмч н.Пүрэвдулам “Сэргээн засах эмчилгээ хийлгэдэг хүүхдүүд байнгын зовиуртай байдаг. Үр дүн богино хугацаанд гарахгүй ч хөл дээрээ боссон хүүхэд бий. Байнгын чангаралтай булчинг суллах зэргээр эмчилгээ сувилгаа хийснээр хүүхдийн хөдөлгөөн, ааш зан засардаг. Хөгжлийн бэрхшээлтэй хүүхэд хөдөлгөөн хийхгүй удах юм бол үе мөчний буруу хэлбэртэй болно. Булчин шөрмөс нь богиносох аюултай. Сэргээн засах эмчилгээ нь архаг болон суурь өвчлөл, гэмтэл бэртлийн үлдэц, хөгжлийн бэрхшээлтэй хүмүүст зайлшгүй шаардлагатай, хэрэгцээ өндөр үр дүн сайтай.
Хөгжлийн бэрхшээлтэй, архаг буюу суурь өвчлөл, гэмтэл бэртлийн үлдэцтэй хүүхдүүдэд олон удаагийн курс эмчилгээ, уйгагүй ажиллагаа шаардлагатай  учраас сэргээн засах эмчилгээ хийлгэх эрэлт хэрэгцээ өндөр байна.
Иймээс бага болон эрт үед нь сэргээн засах эмчилгээнд хамрагдсанаар үр дүнтэй” гэсэн юм.
Сэргээн засах хөгжлийн төвөөр хүүхэд нь үйлчлүүлж байсан Баянзүрх дүүргийн II хорооны иргэн Г “Манай хүүхэд төрөлхийн саажилттай. ДЦБ гэсэн оноштой. Сэргээн засах хөгжлийн төвд  хүүхдээ дөрвөн сар орчим эмчлүүлж байсан. Хөдөлгөөн заслын эмчилгээнд ойрхон давтамжтай явбал бага багаар сайжирдаг. Гэтэл хөгжлийн бэрхшээлтэй хүүхдүүдэд хамгийн их хэрэгтэй газраа татан буулгах нь битгий хэл илүү  олон болгох хэрэгтэй” хэмээв.
Харин Сэргээн засах хөгжлийн төвийг яагаад татан буулгасан талаар Гэр бүл хүүхэд залуучуудын хөгжлийн газрын Тамгын газрын дарга Ш.Чинбатаас тодруулахад “Татан буулгасан асуудал байхгүй. Үйл ажиллагааны чиглэлийг өөрчлөөд Өнөр бүлд төвд шилжүүлсэн. Хөгжлийн бэрхшээлтэй хүүхдүүдэд үйл ажиллагаа явуулах бүрэн зөвшөөрөлтэй, эмчилгээ эрхлэх эрхтэй байгууллагаар үйлчлүүлэх ёстой. Гэтэл Сэргээн засах хөгжлийн төвд тийм эрх байхгүй. Хүүхдүүдэд эрсдэл учрах юм бол хариуцлагыг хэн хүлээх юм. Бид тус төвөөр үйлчлүүлж байсан хүүхдүүдийн эцэг эхтэй уулзаж Сэргээн засах хөгжлийн үндэсний төвтэй хамтарч ажиллахаар ярилцсан. Чиглэл өгсөн байгаа. Өнөр бүлийнхэн эцэг эхчүүд рүү ярьж янз бүрийн асуудал үүсгэдэг юм шиг байна лээ” гэв.
Хүүхдийн тусламжийн 108 төвтэй болсныг буруутгаагүй ч сэргээн засах эмчилгээ авч байсан нийслэлийн асрамж  халамжийн төвийн болон дүүргийн хөгжлийн бэрхшээлтэй хүүхдүүд хуваарийн дагуу чирэгдэлгүй үйлчлүүлдэг байтал  өнөөдөр эмчилгээ нь тасалдаж, хаана хандахаа мэдэхгүй явна гэдгийг эцэг эхчүүд хэлж байсан юм. Түүнчлэн Гэр бүл хүүхэд залуучуудын хөгжлийн газрын чиглэл өгсөн гээд байгаа Сэргээн засах хөгжлийн үндэсний төвд очиход дараалал ихтэй, хуваарийн дагуу эмчилгээ хийхгүй хойшлуулдаг гэдгийг эцэг эхчүүд хэлж байсан юм.
С.Уянга
Эх сурвалж: “Зууны мэдээ” сонин

URL:

Сэтгэгдэл бичих

АНХААРУУЛГА: Уншигчдын бичсэн сэтгэгдэлд FACT.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 9318-5050 утсаар хүлээн авна.