“СЭЛЭМ” ЭРГҮҮЛСЭН С.БЯМБАЦОГТ ГЭЖ ХЭН БЭ?

TSogtНИТХ-ын төлөөлөгч С.Мөнхчулууны төрсөн дүү С.Бямбацогт олон нийтийн газар  сэлэм эргүүлэн танхайрсан хэргийн дуулиан олон нийтийн цахим сүлжээнд өрнөсөн хэвээр байна.

Өнгөрсөн ням гарагийн шөнө Баянгол дүүргийн I хороонд байрлах “Castle” баарны үүдэнд хэсэг залуус танхайрч, сэлэм эргүүлэн бусдын бие махбодод халдахыг завдсан бичлэг цацагдсан билээ. Бичлэг дээрх сэлэм эргүүлж байсан С.Бямбацогт нь энэ сарын 11-ны орой “Arigu lounge art” шөнийн клубийнхээ нээлтийг хийсэн байна. Тэрээр цагдаа нарыг ирэхээс өмнө зугтаж, өглөө 06:00 цагийн үед Баянзүрх дүүргийн 11 дүгээр хороонд байрлах “Ривер бич” гэх амралтын газрын үүдэнд дахин бусадтай зодолдож, хамт явсан нөхдийнхөө хоёрыг нь зодон гэмтээж зугтсан байна. Түүнд холбогдох хэргүүдийг Баянзүрх дүүргийн Цагдаагийн III хэлтэс болон Баянгол дүүргийн Цагдаагийн I хэлтэст шалгаж байгаа юм.

С.Бямбацогт нь  ах С.Мөнхчулуунаасаа авсан гэх “Vip security” хамгаалалтын албыг эзэмшиж, МҮЭ-ийн Соёлын төв ордон, Соёлын төв өргөө гэх мэт үзвэр үйлчилгээний газрууд, нэр нөлөө бүхий баар цэнгээний газруудын хамгаалалтыг хариуцан ажилладаг байжээ. Тэрбээр өмнө нь хэд хэдэн хэрэгт холбогдож байсан бөгөөд 2012 онд Б, Э, Б, Б, А, Н, А, Д нарын хэсэг нөхдийн хамт Эрүүгийн хуулийн 98.1 “Бусдын бие махбодид хүндэвтэр гэмтэл санаатай учруулах”, 153.1 “Бусдын эд хөрөнгийг санаатайгаар устгах, гэмтээх”, 243.1 “Мөрийтэй тоглох” гэх зүйл ангиудаар эрүүгийн хэрэгт татагдаж, цагдаагийн байгууллагаар шалгагдаж байжээ. Шүүхээс тэдэнд холбогдох хэрэгт яллах дүгнэлт үйлдэж байсан аж.

Эрүүгийн хуулийн 243.1-д “Хуулиар хориглосон мөрийтэй тоглоом /казино/ тоглосон, түүнийг зохион байгуулсан бол хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах ял шийтгэнэ” хэмээн заасан байдаг. Гэвч тэд ял авалгүй, хэрэг нь хаагдсан байдаг.


URL:

Сэтгэгдэл бичих

АНХААРУУЛГА: Уншигчдын бичсэн сэтгэгдэлд FACT.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 9318-5050 утсаар хүлээн авна.