Монгол Улс авлигад идэгдсэн индексээр гуравхан жилийн дотор 18 орны дээр гарлаа

НҮБ-ын Ерөнхий ассамблей жил бүрийн 12 дугаар сарын 09-ний өд­рийг “Авлигын эс­рэг Олон улсын өдөр” хэ­мээн тунхагласан билээ. Ав­лигын шалтгааныг арил­гах, үр нөлөөг бууруулах цогц арга хэмжээг тусгасан НҮБ-ын кон­венцийг дэлхий даяар ав­лигатай тэмцэх гол хэрэгсэл хэмээн үздэг.
Монгол Улс 2005 оны 10 дугаар сарын 27-нд НҮБ-ын Авлигын эсрэг кон­­венцийг соёрхон баталс­наар нэгдэн ор­сон түүхтэй. Ингээд Ав­лигын эсрэг хуулийн дагуу Авлигатай тэм­цэх газар /АТГ/-ыг бай­гуулж байв.
Тэгвэл АТГ үүсэн байгуулагдсаны зургаан жилийн ойн босгон дээр Мон­гол Улс авлигын индек­сээр 183 орноос 120 дугаарт орж, хойш ухар­чээ.
2008 онд авлигалын индексээр 102-т бичигдэж байсан Монгол Улс гуравхан жилийн дотор 18 орноор  ухралт хийлээ. Энэ нь манай улс авли­гал, хээл хахуульд асар хурдацтай идэгдэж бай­гаагийн тод илрэл.
АТГ гэдэг бай­гуул­лага бий болсноос хойш төрийн томоохон албан ту­шаал­тантай холбоотой хээл хахуулийн ганц ч болов хэрэг илрүүлж чадсангүй.
Авлигатай тэмцэнэ гэж байгуулагдсан болохоор осолдохгүй л тө­рийн томчуудын хөрөн­гө ор­­логын мэдүүлгийг жил бүр шинэчлэн гаргаж, хааяа нэг аймаг, сумдын жижигхэн дарга нарыг буруутгаж, арга хэмжээ авахуулна. Гэхдээ аймаг, сумын Засаг даргыг ч биш. Бүр тэдний доор ажилладаг ардаа хүнгүй, арын хаал­гагүй нөхдийг барь­даг. Ерөнхийдөө жараахайнуудыг л ээрч хоргоодог ажилтай.
Гэтэл наагуур нь том том акулууд улайм цайм авлига хийж, бараг АТГ-ын ажилтнуудад өөрсдөд нь хэдэн төгрөг өгч, хавтаст хэргээ хаалгах нь хол­гүй байна.
АТГ-ын ажил­чид төрийн байгуул­ла­гуудаас хамгийн хан­гамж сайтай нь. Тэгсэн хэр нь л төрийн томчууд үнэ цохиод хэргээс мул­тарчихдаг болсон. Сүүл­дээ энэ асуудал нь бүр ил цагаан болж дээ.
Мэдээж энд АТГ байгуулагдсан зургаан жилийн хугацаанд гурав дахь даргаа сольж бай­гаа талаар дурсахгүй өнгөрч болохгүй.
Анхны дарга Б.Дан­гаа­сүрэн нь Авст­рали улсад зохион бай­гуу­лагд­сан Олон улсын бага хуралд орол­цохоор яваад 2007 оны 10 дугаар сарын 24-нд нас барсан. Удаах дарга Ч.Сан­гарагчаа нь 2011 оны гуравдугаар сарын 22-нд 2.4 жилийн хорих ялаар шийтгүүлж, хо­ригд­сон.
Энэ жил шинэч­лэгд­сэн авлигын индексээр Мон­гол Улс 120-д орсон бас нэг шалтгаан нь дарга, удирдлагагүй яв­сан долоон сар.
АТГ-ын дарга, дэд дарга нарыг нь төрийн нууц задруулсан хэмээн буруутгаж бараг л авлигад идэгдсэн гэх нь холгүй шоронд хорь­сон. Ингэснээр АТГ гэдэг байгууллагын үйл ажил­лагаа илтэд догол­дож, хэн дуртай нь хэдэн төг­рөг өгөөд хавтаст хэр­­гээ хаалгахдаа тулж байна.
Нэр бүхий УИХ-ын ги­шүүд, төрийн өндөр албан тушаалтнуудын хэ­рэг АТГ-т ирсэн боловч хэрэгсэхгүй бол­гох саналтайгаар про­курорт шилжүүлдэг уламж­лалтай болчихов.
Харин иргэд, олон нийтийн шахалт, шаард­лагаар өнгөрсөн сарын 17-нд АТГ-ын дар­гаар Н.Ганболдыг, дэд дар­гаар  Б.Хурцыг томилс­ноор энэ асуудал жаахан саар­магжив бололтой.
Энэ эрхмүүдийн хувьд АТГ-ын даргын ал­бан тушаалд ногоон гэр­лээр томилогдсон гэж хэлэхэд болно. Тиймдээ ч олон нийт Н.Ганболд, Б.Хурц нараас их зүй­лийг хүлээж байна. Тэд авлигын индексээр 120-д бичгдсэн Монгол Улсынхаа нэр хүндийг хэр хурдан хугацаанд өр­гөх вэ гэдэг асуулт удах­гүй хариугаа өгнө биз ээ.


URL:

Сэтгэгдэл бичих