Ноён уулаа маргаашийн шүүх хурлаар аварч чадах уу?

Маргааш Ноён уулын шүүх хуралтай. Ноён уулыг ноохойлж түүх судар түгэх эрдэнэсийг нь хамт ухах бодол тэдэнд буй. Алтаа ч авна, арын түүхийг нь ч түйвээх бодол харийнханд байхгүй өөр хэнд байх билээ. Өвгөдийн үүх түүхийг уландаа гишгэж ухах алт нэрээр арилжаалах санаа ард нь байхыг үгүйсгэхгүй. Увайгүй улцгар улс төрчдөд алган дээр нь доллар амтлуулбал доодохоо тасдан өгч, ээжийнхээ далаар мэргэлж мэдэх хүмүүс. Улс төр бол үхлийн цалам мөн. Шуналд идэгдэн шулам болсон олон улс төрчид Ноён уулын ард буйг өмнө нь бичиж байсан. Жаргалтулгын Эрдэнэбат мэдээж Миёэгийн нам дамжсан бүлэглэл, бас Бороо Гоулдаа Сентерра Гоулд болгон сэмхэн залилсан канадууд, газар ухаж гахай шиг сэндийлж гайгүй хөлжсөн дотоодын самуун луйварчид. Бүгдийг мөнгөөр татахаар санаархаж мөддөө шийд гарахгүй бараг 40 дахь удаагаа Монголын шүүх хурал хойшилж байгаа нь мөнгө хүчтэй, мөнөөх сүлжээ баттай байгааг давхар харуулж байгаа хэрэг. Ерөнхийлөгч Х.Баттулга Мандал сумынхантай уулзахдаа Ноён уулаа хамгаалах талд шүүхийн шийдвэр гарна гэдэгт итгэлтэй байгаагаа хэлээд авсан. Тэр ард түмний дэмээр гарч ирсэн болохоор ард түмэнд асар өртэй хүн.

Харин өрөө цайруулах өндөр болзол хүлээлт өнөөдөр өлмийд байна уу гэж харагдахаар болоод байгааг нуугаад яахав. Шинэ сонин содон улс төрч өөдрөг өгөөмөр сэтгэлтэн, өлзийгээ өгсөн төрийн хар хүний эрэлд монголчууд мордсон байна. Тэд бүхлээр нь шинэчлэхийг хүсэж байна. Бүрэн ялалтаар Монголоо аврахыг бодож байгаа. Бүгд дотроо зүхэлтэй, дороо бодолтой болжээ.Ташуураа барихаар монголчууд дэлхийн талыг эзэлж байсан дэвээ шаваа нь байлгүй хаачихав дээ. Зүрхэн нутагт амьдардаг монголчуудын оршихуйгаар оролдсон хэнбугай ч өөдөлдөггүй. Хүн төрөлхний мөн чанар өөрчлөгдөж байна. Энэ нь монголчуудтай холбооотой. Монголчууд доройтоход дэлхий доройтно, ийм барилдлагатай. Монголчуудыг оролдож болохгүй, газар нутгийг нь гаслуулж болохгүй гэдгийг дэлхий ч, дэнж дээр амьдрагсад ч ойлгож цөхөхгүй яваа. Монголд бодлого дутаж байна. Төр засаг яам шинжлэх ухаан археологийн бодлого алга. Биополитик ч алга. Монголын овог аймгууд төрийн төлөө тангараг өргөдөг байв. Одоо өөрсдийнхээ бүлэглэл явцуу эрх ашигийн төлөө тангараг тавьдаг болжээ. Төр ингэж явцуурсан байгаа нь харийн бодлогын үр шим. Намаар, нам дотроо бүлэглэлээр бүлэглэл дотроо бүдүүвчээр тусгаарлагдаж байна. Хэвлэл мэдээлэл бүрэн худалдагдаж, хууль цааз хахуульд идэгдэж, банк санхүүгийн луйвар мөнгө хүүлэлт хирээс хэтрэв. Баялгаар баяжиж байгаад хяналт тавих төр алга. Түмний хараа хяналтаас ч дор байна. Тиймд түргэн хувьсал өөрчлөлт хийхийг хүн бүр санаашрах болов. Санаж явахад бүтнэ сажилж явахад хүрнэ.

Хулгай бүхэн илэрч, худал бүхэн мохооогдож байна. Сайхан өдөр ирж, сайн ноёд цуглаж саруул ухаанаар нурсан Монголоо босгож, нөгөөдүүлээс салгаж авах нь бидний эрхэмлэн зорих бодлого байх учиртай. Эвийг сахиж, эднээс салагтун.

https://www.facebook.com/photo.php?fbid=1885307505100666&set=a.1393718760926212.1073741828.100008643046597&type=3&theater