ӨГИЙНУУР СУМААС ГАРСАН ШҮЛХИЙ ГАЗАР АВЧ, ХЯНАЛТАА АЛДЖЭЭ

p1ca24g0s31t3aqua1dc68ki11hb3Архангай аймгийн Өгийнуур суманд энэ оны эхээр малын гоц халдварт шүлхий өвчин  илэрч, хорио цээрийн дэглэм тогтоожээ.

Гэвч уг халдварт өвчинг дарж дийлэлгүй өвөл, хавар, зун гэсэн гурван  улирлын нүүр үзээд байгаа төдийгүй зэргэлдээх Батцэнгэл, Төвшрүүлэх сумын малд халдварласан гэх мэдээлэл байна.

Өгийнуур суманд өвчилсөн бүх  малыг устгаж, хорио цээрийн  дэглэмийн бүсэд байгаа бүх үхрийг вакцинжуулсан гэх боловч 6 дугаар сарын эхээр хонинд энэ өвчин илэрч дахин онцгой дэглэм тогтооход хүрчээ.

Анх  тус сумын зэргэлдээ Хотонт суманд энэ өвчин  гарч, хорио цээрийн дэглэм тогтоогоод, 2 сарын дотор таслан зогсоож чадсан байхад Өгийнуур суманд энэ өвчин улам даамжирч, удтал үргэлжилсэн хорио цээрийн дэглэмтэй бүс нутаг болоод байна.

Малчид гоц халдварт өвчнөөр малаа олон тоогоор устгуулахын зэрэгцээ хатуу хахир өвөл хаврын хэцүү цагт мал нь ихээхэн хэмжээгээр өлдөж хорогдсон, зуны эхэн сар гарсаар байхад дусал ч бороо ороогүй, ямар ч өвс ногоо ургахгүй, мал нь  одоо ч өргүүлж хорогдсоор  байхад хонинд энэ өвчин бас нэмж шинээр гарч, дахин олон малаа устгуулах дээрээ тулаад байгаад  малчдын сэтгэл дундуур байна.

Өгийнуур сумын Засаг даргыг өнгөрсөн оны сүүлчээр ажлыг нь дүгнээд Сумын Иргэдийн төлөөлөгчдийн хурал нь огцруулсан боловч, аймгийн зүгээс    удтал удирдлагагүй, Засаг даргагүй явуулж байгаад сумын иргэд бухимдалтай байгаа аж.

Сум удирдлагагүй явснаас  хорио цээрийн дэглэм илт алдагдсан, хяналт хариуцлага сул, нэгдсэн  удирдлага, зохион байгуулалтаар хангаж чадаагүй гэж холбогдох яам тамгын газарт нутгийн иргэдээс санал гомдол тасрахаа байжээ. Аймгийн Засаг дарга нь сум орон нутаг нь гамшгийн байдалтай эзэнгүй  байхад санаа зовсон шинжгүй, гамшгийн бүст ганц  ч удаа ирж, нөхцөл байдалтай танилцаагүй төдийгүй сумын Засаг даргыг томилох асуудлыг аргацаан хойшлуулсаар өнөөг хүрсэн гэнэ.

О.Сайхан


URL:

Tags:

Сэтгэгдэл бичих

АНХААРУУЛГА: Уншигчдын бичсэн сэтгэгдэлд FACT.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 9318-5050 утсаар хүлээн авна.