ФИФА Мексикийн хөлбөмбөгийн холбоог торгожээ

712-1529562538p1cgggan7a1hsg11be1l8v16tn1hbn3МОСКВА. /ТАСС/. Олон улсын хөлбөмбөгийн холбоо /ФИФА/ Мексикийн хөлбөмбөгийн холбоог 10 мянган ам.доллароор торгожээ. Ийм шийдвэр гаргасан нь Герман болон Мексикийн шигшээ багийн хооронд болсон тоглолтын үеэр Мексикийн хөгжөөн дэмжигчдийн гаргасан үйлдэлтэй холбоотой юм. Энэ тухай “Ассошиэйтед пресс” агентлагийн сурвалжлагч Роб Харрис “Твиттер” хуудсаараа дамжуулан мэдэгджээ.

Хөлбөмбөгийн 2018 оны ДАШТ-ний F хэсгийн эхний тоглолт Герман-Мексикийн халз тулаанаар эхэлж мексикчүүдийн гайхамшигтай ялалтаар өндөрлөсөн билээ. Тоглолтын үеэр Мексикийн хөгжөөн дэмжигчид орилж хашгиран, Германы хаалгач руу ижил хүйстнийг эсэргүүцсэн утга агуулга бүхий үг хаяжээ. Түүнчлэн ФИФА Сербийн хөлбөмбөгийн холбоог 10 мянган ам.доллароор торгосон байна. Өнгөрсөн ням гарагт Коста-Рика болон Сербийн хооронд болсон тоглолтод Сербийн шигшээ баг хожсон юм.
ФИФА Мексикийн хөгжөөн дэмжигчдийг буруутгаж байгаа нь анхны удаагийх биш юм. Тоглолтын үеэр Мексикийн хөгжөөн дэмжигчид өрсөлдөгч багийнхаа хаалгачид шахалт үзүүлэхийг оролдох тохиолдол олонтаа гардаг бөгөөд “puta” хэмээн хашгирч эхэлдэг нь Мексик хэлэнд бэлгийн цөөнхийг басамжлан доромжилсон утга агуулдаг аж. 2017 онд ОХУ-д болсон Холбоодын цомын тэмцээний үеэр ФИФА Мексикийн Хөлбөмбөгийн холбоонд хандан тус улсын хөгжөөн дэмжигчдийг дахин ийм үг ашиглахгүй байхыг уриалж байжээ.
Э.Аянзаяа
Эх сурвалж: Монцамэ агентлаг

URL:

Сэтгэгдэл бичих

АНХААРУУЛГА: Уншигчдын бичсэн сэтгэгдэлд FACT.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 9318-5050 утсаар хүлээн авна.