“Айвенхоу Майнз”-ынхан “Рио Тинто”-д 51 хувиа өгөхгүйн тулд хөдөлж эхэлнэ

“Рио Тинто”, “Айвенхоу Майнз” компанийн хооронд үүссэн маргааныг шийдвэрлэх Арбитрын шүүх хурлын эцсийн шийдвэр гарлаа.

Оюутолгой төслийн гол хувь эзэмшигч “Айвенхоу Майнз”-ын хувьцааг “Рио Тинто” үргэлжлүүлэн худалдаж авах эрхээ баталгаажуулж чаджээ. “Рио Тинто”-ийн төлөөлөгчид “Манай компани “Айвенхоу Майнз”-ын гол хувьцаа эзэмшигч болохыг хүсч байгаа болохоос биш бүхэлд нь эзэмших сонирхолгүй байгаа” хэмээн мэдэгдсэн байна.

Арбитрын шүүхийн шийдвэр гарсны дараа Торонтогийн Хөрөнгийн бирж дээр “Айвенхоу Майнз”-ын нэгж хувьцааны ханш 17 хувиар буурчээ. Харин “Рио Тинто”-ийн мэдэгдлийн дараа нэгж хувьцааны ханш нь Торонтогийн бирж дээр 16.56 канад доллар болж, 2008 оны аравдугаар сараас хойших хамгийн үзүүлэлттэй гарсан юм. Гэтэл Лондонгийн Хөрөнгийн бирж дээрх “Рио Тинто”-гийн ханш 2.1 хувиар өсчээ.

“Рио Тинто” “Айвенхоу Майнз”-ын хувьцааны 49 хүртэлх хувийг ирэх оны нэгдүгээр сарын 18-наас өмнө худалдан авах эрхтэй. Харин энэ хугацаа өнгөрсний дараа дахин нэмж хувьцаа авах эрхийг нь саяны хурлаар баталгаажуулсан. “Айвенхоу Майнз”-ын хувьд энэ байдлаас сэргийлж өнгөрсөн онд жижиг хувьцаа эзэмшигчдийн эрхийг хөндөж, олон улсад хувьцаагаа худалдана хэмээн хөөрцөглөж байсан ч шинэ гэрээ ёсоор “Рио Тинто”-ийн зөвшөөрөлгүйгээр хаашаа ч хөдөлж болохгүй болсон юм.

Тиймээс одоо “Рио Тинто”-д 51 хувиа өгөхгүйн тулд “Айвенхоу Майнз” өрсөлдөгч компаниудынх нь анхаарлыг татаж, тэдэнд хувьцаагаа худалдах санал тавьж магадгүй хэмээн “Bloomberg” мэдээлжээ.

“Рио Тинто”-оос гаргасан мэдээлэлд дурьдсанаар болж 2020 он гэхэд Монголын эдийн засгийн гуравны нэг хувийг дангаараа бүрдүүлэх Оюутолгой төслийг эзэмшиж байгаа нь “Айвенхоу Майнз”-ын цорын ганц давуу тал. Сиднейд төвтэй “Macquarie”-ийн шинжээч Ли Бауверс “Айвенхоу Майнз” компанийнхан “Рио Тинто”-д бүх зүйлээ алдахгүйн тулд одоо л хөдөлж эхэлнэ” хэмээн дүгнэжээ. Үүнийг нотлох мэт”Айвенхоу Майнз”-ын төлөөлөгчид “Рио Тинто”-той хийж буй хуулийн маргаан цаашид үргэлжилнэ” гэж мэдэгдсэн байна.

Гэхдээ Оюутолгойн олборлолт одоо болтол эхлээгүй байгаа. Үүнээс болж “Айвенхоу Майнз”-ын хувьцааны ханш өдөр ирэх бүр буурч байна. Тиймээс энэ бол хувьцааг нь хямдруулж байгаад худалдаж авах гэсэн “Рио Тинто”-ийн арга гэх таамаг ч байгаа юм.

Ямартай ч “Рио Тинто” “Айвенхоу Майнз”-ыг мэдэлдээ авах зам нь дардан боллоо. Харин “Рио Тинто” хэний мэдэлд очих вэ. Нэгэн цагт Оюутолгойн төлөө өрсөлдөж байсан Хятадын “Чайналко” “Рио Тинто”-ийн хамгийн том хөрөнгө оруулагч болох сонирхолтой байгаагаа илэрхийлсэн. Үүнд Том Албанез эхэндээ дургүйцэж байсан ч эцэст нь Хятад дахь салбарын хоёр ажилтнаараа туг тахих шахаж, “Чайналко”-д бууж өгсөн юм. “Чайналко” компанийн хувьд “Рио Тинто”-ийн Оюутолгой дахь хувьцаанд хөрөнгө оруулах сонирхолтой байгаагаа илэрхийлсээр удаж байна.


URL:

Сэтгэгдэл бичих

АНХААРУУЛГА: Уншигчдын бичсэн сэтгэгдэлд FACT.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 9318-5050 утсаар хүлээн авна.