Путин, Абэ нар найрамдлын гэрээ байгуулах хэлэлцээг идэвхжүүлэхээр тохиролцов

5becdcfecd5b1СИНГАПУР. /RIA Novosti/. ОХУ-ын Ерөнхийлөгч Владимир Путин, Японы Ерөнхий сайд Шинзо Абэ нар хоёр орны хооронд найрамдлын гэрээ байгуулах хэлэлцээг 1956 оны тунхаг бичигт тулгуурлан идэвхжүүлэхээр тохиролцсон тухай Оросын төрийн тэргүүний хэвлэлийн нарийн бичгийн дарга Дмитрий Песков мэдээлжээ. Хоёр орны удирдагчдын уулзалт Сингапурт Зүүн Азийн улсуудын холбооны /АСЕАН/ дээд хэмжээний уулзалтын үеэр болсон байна.
Үүний сацуу, Путин, Абэ нар Курилын өмнөд арлуудад аж ахуйн хамтарсан үйл ажиллагааг удахгүй явуулахад чиглэсэн ажлыг эрчимжүүлэхээр тохиролцсон тухай “Kyodo” агентлаг мэдээлжээ.
Москва болон Токио Курилын өмнөд арлуудад загасны аж ахуй, хүлэмжийн аж ахуй, аялал жуулчлал, салхины эрчим хүч, хог хаягдлыг дахин боловсруулах гэсэн таван чиглэлээр аж ахуйн хамтарсан үйл ажиллагаа явуулах талаар зөвлөлдөж байгаа юм. Талуудын үзэж буйгаар, эдгээр чиглэлээр хамтран ажиллах нь найрамдлын гэрээ байгуулахад чухал алхам болно.
Урьдчилсан болзолгүйгээр найрамдлын гэрээ байгуулах саналыг Путин Зүүн Азийн эдийн засгийн форумын үеэр тавьсан билээ. Оросын удирдагчийн үзэж буйгаар, ийм гэрээ байгуулах нь хоёр орны хоорондох итгэлцлийн түвшнийг дээшлүүлж, газар нутгийн маргааныг шийдэх асуудлыг түргэтгэнэ. Гэвч Абэ газар нутгийн асуудлыг шийдэхгүйгээр найрамдлын гэрээ байгуулах боломжгүй гэдгийг удаа дараа мэдэгдсэн юм. Үүний сацуу, Японы улс төрийн хүрээнийхэн болон тус улсын Ерөнхий сайд өөрөө Оросын Ерөнхийлөгчийн тавьсан саналыг хэлэлцээг урагш ахиулах хүсэлтэй байгаагийн илрэл гэж харж байгаа аж.
Дэлхийн хоёрдугаар дайны дараа Орос болон Япон хооронд найрамдлын гэрээнд гарын үсэг зураагүй нь хоёр орны харилцааг олон жилийн турш харлуулж байгаа юм. Япон улс Курилын өмнөд хэсгийн Итурупа, Кунашира, Шикотана болон япончуудын Хабомаи гэж нэрлэдэг одоо хүн оршин суудаггүй арлыг өөрийн улсын газар нутаг гэж үздэг.
ЗХУ болон Япон 1956 онд хамтарсан тунхаг бичиг баталжээ. Уг тунхагт найрамдлын гэрээ байгуулсны дараа Хабомаи болон Шикотана арлыг Японы талд шилжүүлэн өгөх боломжийг Москва судлахыг зөвшөөрсөн байна. Харин Кунашира болон Итурупа арлыг хэрхэхийг тусгаагүй аж. Энэ тунхаг нь газар нутгийн маргаанд цэг тавина гэж ЗХУ-ын эрх баригчид тооцоолжээ. Гэвч дараа дараагийн хэлэлцээ ямар ч амжилтад хүрээгүй байна.
МОНЦАМЭ

URL:

Сэтгэгдэл бичих