Сирийн босогчид гадаадын найман инженерийг хулгайлжээ
Сирийн баруун хойд хэсэгт орших Идлиб мужид өнгөрсөн мягмар гарагт хэдэн арван босогч, алан хядагчийг бүсэлж, устгасан талаар “САНА” агентлаг мэдээллээ.
Цэргийн тусгай ажиллагааныхан тэднийг Туркийн хилтэй ойролцоо, Жебель-эз-Завия хэмээх уулархаг нутгаас баривчилсан байна.
Харин энэ өдөр зэвсэгт дайчид Сирийн Хомс мужаас гадаадын харьяат, цахилгааны найман инженерийг хулгайлжээ. Одоогоор инженерүүд чухам хаана байгаа нь тодорхойгүй байна.
“Жандар” цахилгаан станцад ажилладаг эдгээр инженер микро автобусаар явж байгаад сураггүй болжээ. Тэднийг зэвсэгт алан хядагчид хулгайлсан болох нь анхан шатны мөрдлөгийн үеэр тогтоогджээ. Эрчим хүчний яамнаас хөлсөлсөн гадаадын инженерүүд үйлдвэрлэлийн бүсээс алга болсон нь илэрсэн аж. Хулгайлагдсан инженерүүд аль улсын иргэд болох нь одоогоор тодорхойгүй байна.
Үүнээс гадна Сирийн хууль сахиулагчдын мэдээлснээр тус улсын өмнөд хэсэгт босогчдын ээлжит халдлага дэгдэх үеэр 14 цэрэг, цагдаа бүгэгсэд дээр очиж чаджээ. Тус улсад ганцхан хоногийн дотор 82 хүн халдлагын золиос болж амиа алдсан байна. Амиа алдагсдын дотор энгийн номхон иргэд ч байгаа гэнэ.
Сири улсад өнгөрөгч гуравдугаар сарын дундаас Засгийн эсрэг бослого дэгдэн, одоо ч үргэлжилсээр байгаа юм. Сөрөг хүчнийхэн тус улсын Ерөнхийлөгч Башар Асадыг огцрохыг шаардаж, ийнхүү бослого зохион байгуулж байгаа аж. Энэхүү шаардлагыг АНУ болон Европын орнууд дэмжиж, Дамаскийн эсрэг эдийн засгийн хориг арга хэмжээ авч байгаа билээ.
НҮБ-ын мэдээллээс үзэхэд Сирид болж буй мөргөлдөөний уршгаар амиа алдагсдын тоо 5000-д хүрчээ.
Харин Сирийн засаг захиргаа хоёр талаас 1.5 мянга гаруй хүн амиа алдсан, үүнээс 1.1 мянга нь хууль сахиулагч гэж үзжээ. Түүнчлэн босогчдын зэвсэг, техник хэрэгсэл сайн байгаа талаар мэдээлсэн байна.
Сирийн зөрчилдөөн сүүлийн үед улам хурцдаж, зэвсэгт мөргөлдөөн болон хувираад байгаа. Хэдхэн сарын өмнө Сирийн армиас оргосон цэргүүд Засгийн газрын эсрэг зэвсэгт тэмцэл явуулах зорилгоор Турктэй хиллэдэг бүсүүдэд “Сирийн чөлөөт арми”-ийг байгуулсан юм.
URL:
