Огноо: 2018/12/6 19:12:49

МХЕГ-ын газар, хэлтсийн дарга нар 20 гаруй аж ахуйн нэгжээс хахууль авчээ

МХЕГ-ын Экспорт, импорт, хилийн хорио цээрийн хяналтын газрын дарга Б.Аззаяа, хэлтсийн дарга Т.Баярсайхан нарыг өнгөрсөн оны арванхоёрдугаар сарын 7-нд бусдаас их хэмжээний хахууль авч байх үйлдэл дээр нь АТГ-ынхан саатуулсан билээ. Тэдэнд холбогдох хэргийг шалгаж дуусаад шүүхээр шийдвэрлүүлэх саналтай НПГ-т шилжүүлсэн байна. Тэд хуулиар хүлээсэн чиг үүрэг болох экспортын тусгай зөвшөөрөл олгохдоо эрх мэдлээ урвуулан ашиглаж, хахууль авдаг байсан нь мөрдөн байцаалтаар тогтоогдсон аж. Хилээр самар, мах, дэрвэгэр жиргэрүү гаргах тусгай зөвшөөрөлтэй аж ахуйн нэгжүүд МХЕГ-ын Экспорт, импорт, хилийн хорио цээрийн хяналтын газраас дахиж гэрчилгээ авч, бараагаа нэвтрүүлдэг бөгөөд үүн дээр нь дээрх хүмүүс ажиллан хэтэвчээ зузаалсан бололтой. Уг гэрчилгээг олгохдоо тухайн барааны хэмжээг хувилж тодорхой хэмжээний мөнгөн дүнд шилжүүлээд нэхдэг байсан гэдгийг эх сурвалжууд хэлж буй. Тухайлбал, нэг аж ахуйн нэгж 5300 ам.доллар төлөх ёстой болсон бөгөөд байгаа нь 5100 “ногоон”-той тэнцэх төгрөг байсан гэнэ. Гэтэл “Гүйцээж ир” хэмээн гэрчилгээг нь олголгүй хөөн гаргасан тохиолдол ч байсныг гэрчүүд мэдүүлсэн сурагтай.

Эргэн сануулахад, одоогоос жил шахмын өмнө МХЕГ-ын хэлтсийн дарга Т.Баярсайхан 30 сая төгрөгтэй тэнцэх валют авч байгаад үйлдэл дээрээ АТГ-ынханд баригдсан билээ. Тус газрын мөрдөгчид тэр шөнөдөө дээрх албан тушаалтан болон МХЕГ-ын Экспорт, импорт, хилийн хорио цээрийн хяналтын газрын дарга Б.Аззаяа нарын албан өрөө, гэрт нь нэгжлэг хийсэн юм. Улмаар Б.Аззаяагийн гэрээс хахуульд авсан байж болзошгүй 60, Т.Баярсайханыхаас 400 сая төгрөг бэлнээр хураан авсан талаар бид цаг тухайд нь мэдээлсэн. МХЕГ-ын албан тушаалтнуудтай холбоотой авлига, албан тушаалын гэмт хэргүүдийг АТГ-ынхан илрүүлэн шалгасан. МХЕГ-ын Хүнсний аюулгүй байдлын лавлагаа лабораторийн эрх бүхий албан тушаалтнууд шаардлага хангахгүй эм, эмийн бүтээгдэхүүний шинжээчийн дүгнэлтийг өөрчилж байсан үйлдлийг АТГ-т шалгаж удахгүй дуусах юм билээ. Ийнхүү МХЕГ, харьяа салбарт нь авлига, хээл хахуулийн хэрэг удаа дараа гарч байхад тус газрын дарга Н.Цагаанхүүд ямар хариуцлага тооцсон нь тодорхойгүй өдий хүрч буй юм.

Эх сурвалж: Unuudur.mn

URL: