Хүүхэмсэг, трансвестит хөвгүүдээ голж, бага хүүдээ эрх мэдлээ өвлүүлжээ
Умард Солонгосын тэргүүн, Хөдөлмөрийн намын дарга, армийн Ерөнхий командлагч Ким Чен Ун аль хэдийнэ ажилдаа орж, өчигдөр танкийн дивизээ шалгажээ. Энэ үеэр ажиглагдсан нэг өөрчлөлт бол БНАСАУ-ын төрийн сонинууд анх удаа хүнсний хомсдол байгааг хүлээн зөвшөөрсөн явдал.
Таалал төгссөн Ким Чен Ир бол удам залгасан анхны “коммунист хаан” байлаа.
Тэрээр 53 настайдаа төр засгийн эрх мэдлийг авахын өмнө энэ албан тушаалд хэдэн арван жилээр бэлтгэгдсэн. Гэтэл түүний бага хүү Ким Чен Ун 30 нас ч хүрээгүй байхдаа БНАСАУ-ын төрийн тэргүүнээр өргөмжлөгдөж, цөмийн чемоданы түлхүүрийг гардан авч байна.
II Кимийн үлдээсэн гол өв нь амьддаа бүтээж, туршсан цөмийн зэвсэг нь. Иймээс л дэлхийн их гүрнүүд Умард Солонгосын цөмийн зэвсэг буруу гарт орохоос эмээдэг. Ялангуяа нийслэл Пхеньянаас “гар сунгах зайд” оршдог ОХУ, Хятад, Япон зэрэг хөршүүд нь эрх мэдлийн төлөө тэмцлийн үеэр Йонбен дэх цөмийн реактор дэлбэрэхийг хүсэхгүй нь ойлгомжтой.
Харин Умард Солонгосын иргэдийн хувьд удирдагчид нь мөнх амьдардаг. Ким Чен Ирийн эцэг Ким Ир Сенийг нас барахад гурван жил гашуудал зарлаж байсан. Тэр бүү хэл одоо ч гэсэн албан бичиг баримт дээр аль 1994 онд нас барсан Ким Ир Сений гарын үсгийг тавьдаг гээд төсөөл дөө.
Зарим мэдээгээр Ким Чен Ирийг гурван удаа гэрлэсэн гэдэг бол өөр эх сурвалж түүний гурван хүүг нь нууц амрагууд нь төрүүлсэн хэмээжээ.
Ким Чен Ир амьддаа ууган хүүгээ бус багыгаа залгамжлагч болгохоор шийдсэн нь учиртай. Том хүү нь хүүхэмсэг нэгэн бол дунд хүү нь трансвестит гэнэ. Иймээс л тэр Умард Солонгосын тэргүүнээр бага хүүгээ өргөмжилсөн хэрэг.
Ууган хүү Ким Чен Нам одоо 40 нас хүрчээ. Түүний эх нь кино жүжигчин Сон Хэ Рим. Ким Чен Нам 1983-1985 онд Москвагийн тусгай сургуульд франц хэл судалжээ. Гэвч Нам хүү сурахын оронд Москвагийн диско хэсч, брейк бүжих болжээ. 2001 онд Ким Чен Нам хуурамч паспортаар Япон руу нэвтэрч, Диснейленд үзэхийг хүссэн байна. Үүнээс болоод эцэг Ким хилэгнэж, түүний угсаа залгамжлах эрхийг хасчээ. Уг нь түүнийг Умард Солонгосын КГБ дэмждэг байсан юм.
Ууган хүү Нам нууцаар эцэгтэйгээ салах ёс хийсэн талаар Японы “Ёмиури Шимбун” сонин мэдээллээ. Ким Чен Нам Макаод сүүлийн хэдэн жил амьдарч байгаа юм. Тэрбээр эцгээ нас барсан өдөр нь буюу 12 дугаар сарын 17-нд Пхеньянд ирж, хэд хоноод оршуулгад оролцоогүй буцжээ.
Ким Чен Ирийн хоёр дахь хүү Ким Чен Чер одоо 30 настай. Тэр бол Ким Чен Ирийн хамгийн хайртай амраг, бүжгэн жүжигчин Ко Ён Хигийн хүү. Японд төрсөн балетчин бүсгүй хоёр хүү төрүүлжээ.
2004 онд Парист балетчин амрагаа нас барахад “агуу жолоодогч” Ким сэтгэлээр их унаж гутарчээ. Чер яг охин шиг ааштай, амархан гомдож, уурладаг, уйламхай нэгэн гэнэ. Дунд хүүгийнх нь эмэгтэйлэг дүр байдал жолоодогчид таалагддаггүй. Гэтэл тэрбээр нэг удаа эм хүний хувцас өмсөж байгаад эцэгтээ баригджээ. Трансвеститээр мэдээж агуу удирдагч өөрийгөө орлуулахгүй нь тодорхой. Уг нь дунд хүүг нь БНАСАУ-ын армийн генералууд дэмждэг байжээ. Тухайлбал 2003 онд армийнхан Ким Чен Черийн эхэд үнэнчээ баталсан байна. Том хотуудад Ким Чен Ирийн нууц амраг бүсгүйд зориулж, “Манай эрхэм жолоодогчийг хамгаас илүү хайрладаг хүндэт эх” гэсэн самбар лоозон хадаж байлаа. Ким Чен Ирийн албан ёсны эхнэр нь амьд байхад шүү.
Бага хүү 28 настай Ким Чен Уны эх нь Ко Ён Хи. Ун хүү эцгээ юм бүхэнд дуурайдаг байв. Түүнчлэн Ким Чен Ун эцгийнхээ үдэшлэгт оролцож, балетын бүжигчдийг америк хөгжмийн аянд шалдан бүжихийг харж зугаацдаг гэнэ. Намын аппарат тэр чигээрээ түүний талд зогсдог гэнэ. “Daily NK” сонинд мэдээлснээр Ким Чен Ун 2010 онд Хамгсн-Путко мужийн Чхонжин хотын оршин суугч бүсгүйтэй гэрлэжээ. Тэрбээр ах Ким Чен Чер, эгч Ким Ё Жонтой цуг Швейцарьд сурсан байна. Одоо түүний төрсөн өдөр нэгдүгээр сарын наймныг үндэсний баяр болгосон байна.
Ким Чен Ирийн оршуулгыг дэлхий даяар шууд дамжуулж, цэрэг зэвсгийн хүчээ гайхууллаа. Нэг км урт оршуулгын цуваа Пхеньян хотын гол гудамжуудаар 40 км явсан байна. Ким Чен Ирийг Пхеньяны мавзолейд эцэг Ким Ир Сены дэргэд оршуулсан ба хувцас, ажлын ширээ, авто машин, хуягт вагоныг нь мөн үзмэр болгох аж. Түүний шарилыг занданшуулахаар Лениний шарилыг арчилдаг ОХУ-ын В.Козельцев тэргүүтэй мэргэжилтнүүдийг урьсан байна.
2012 онд анхны бөгөөд мөнхийн Ерөнхийлөгч Ким Ир Сений 100 жилийн ой болох юм. Үүнтэй холбогдуулан БНАСАУ тунхаг гаргаж, “Хэрэв дайснууд түрэмгийлэл үйлдвэл Сөүл дэх Өмнөд Солонгосын Ерөнхийлөгчийн оффисийг галан далай болгон хувиргаж, эх орноо нэгтгэх түүхэн ажлыг дуусгана” гэжээ.
Өчигдөр Өмнөд Солонгосын Ерөнхийлөгч Ли Мён Бак, “Солонгосын хойг эргэлтийн үедээ ирлээ. Умард Солонгос чин сэтгэлээсээ хандвал Сөүл, Пхеньяны харилцаанд шинэ эрин эхлэх боломжтой. Бид цөмийн асуудлаар хэлэлцээр хийхэд бэлэн. Харин тэд өдөөн хатгалга хийвэл хатуу хариу барина” хэмээжээ.
URL:
