КАМЕРТОНЧУУД АВЬЯАСЛАГ ЗАЛУУСТ БОЛОМЖ ОЛГОХ ГЭНЭ
17 жилийн турш Монголын рок поп урлагт зүтгэж, үзэгчдийг байлдан дагуулсаар байдаг «Камертон» хамтлагийн дөрвөл зөвхөн өөрсдөө манлайлагч байхыг хүссэнгүй. Авьяаст, чадвартай, урлагийн төлөө цохилох зүрхтэй залуусд боломж олгохыг хүсчээ.
«B» продакшн, Монголын Үндэсний Боловсрол суваг телевиз, «Мюзик бокс» суваг хамтран «Камертон 2» төсөл хэрэгжүүлж эхэллээ. Төслийн гол зорилго нь «Камертон» хамтлагийн дуулах ур чадварыг хадгалсан, ард түмнийг байлдан дагуулах, дэлхийн хөгжмийн ертөнцөд Монгол орныг төлөөлж, мэргэжлийн түвшинд, урлагийн тайзнаа удаан хугацаанд оршин тогтнох шилдэгийн шилдэг цоо шинэ хамтлаг байгуулах юм. Хөгжим бүжгийн коллежийн дөрвөн оюутан хүү, хэн бүхний мэдэх “Маамуу нааш ир” дууг хөгжимгүйгээр дуулж анхлан олны танил болж байсан тэртээх он жилүүдээс хойш тэд рок поп урлагийн ертөнцөд шинэ өнгө аяс, хэмнэл нэмж, олон анхдагч зүйлийн эзэн болсон. “Камертон- 2” шоу нэвтрүүлэгт дуулах ур чадвартай, урлагийн төлөө нэгэн зүрх сэтгэлээр хамтдаа байж чадах 15-25 насны залуучууд болон шинэ залуу хамтлагууд оролцох боломжтой. “Камертон 2” шоунд оролцох хүсэлтэй залуус энэ сарын 20 хүртэл Боловсрол суваг телевизийн байранд бүртгүүлж болох аж.
URL:
