“Слава” нэртэй савласан цагаан будаанаас үхсэн хулгана гарч ирсэн гэв үү

2694

Манай улс цагаан будаагаа ОХУ, БНСУ, Хятад, Вьетнам зэрэг улсаас импортоор авдаг. Нийт импортын 80 орчим хувийг ОХУ-ын цагаан будаа эзэлж байна. Харин саяхан тус улсаас импортолж, “Слава” нэртэйгээр савлагдсан цагаан будаан дотороос үхсэн хулгана гарч ирсэн тухай Б.Ануужин гэдэг эмэгтэй өөрийн цахим хуудсаар дамжуулан мэдээлжээ. Тэрбээр  “Бүр цочлоо, нээрээ арайч дээ. Орос брэнд гэж хуцаад байсан хаа байна, завхарсан юм. Будаан дотроос нь үхсэн хулгана гарч ирж байна. За, хүмүүс минь эрүүл мэнддээ анхаараад энэ цагаан будаанаас татгалзаарай…Бас энэ цагаан будааг савлаж багладаг үйлдвэр юу байдаг юм, тэр бүгдийг мэргэжлийн хяналтаар оруулж худалдаанд гаргахыг хориглох нь зүйтэй. Хулганын хорчийсон биенд наалдсан будаанууд нь шарлачихсан байх юм” гээд тэрхүү үхсэн хулганатай “Слава” цагаан будааны гэрэл зургыг татаж цахим хуудсандаа тавьсан байлаа.

Цагаан сараас өмнө Хятадаас авчирсан цагаан будаа нь химийн аргаар боловсруулсан пластик будаа байсан тухай мэдээлэл цацагдаж, айл өрх болгон шахуу түүнийг нь хувьдаа шалгаж үзэхээр гэр гэртээ шатаан сонжиж, гайхан алмайрч байв. Гэвч тэдгээр нь хуурамч мэдээлэл гэдгийг мэргэжлийн хяналтынхан албан ёсоор мэдэгдэж, тэрхүү шуугиан тэгсхийгээд намжсан. Харин 2010 онд Хятадаас Америк руу нийлсэн цагаан будаа нь яах аргагүй хиймэл буюу пластик будаа байсан бөгөөд хожим нь хятадууд ийм хуурамч будаагаа цэвэр будаатай холиод гадаад орнуудад нийлүүлэх болсон гэх яриа ч гарч байлаа.

ОХУ-аас оруулж ирдэг цагаан будааг хил гаалиар нарийн нягт шалгадаггүй гэсэн мэдээлэл бас урьд нь олонтоо сонсогдож байсан юм. Хэрвээ дээрх үхсэн хулганатай “Слава”  цагаан будааны талаарх гомдол үнэн бол үүний мөрөөр мэргэжлийн хяналтынхан шуурхай ажиллан учрыг олж, тэрхүү цагаан будааг борлуулдаг гэх “Тэсо” компани зэрэг аж ахуйн нэгжүүдийг шалгаж, зөрчлийг яаралтай арилгах шаардлагатай болоод байна. Эс тэгвээс хүмүүсийн эрүүл мэнд, амь насанд аюул учирч мэдэх ажээ.

“Слава” нэртэй савласан цагаан будаанаас үхсэн хулгана гарч ирсэн гэв үү undefined

Эх сурвалж: О.Баяр Шуурхай.мн

URL:

Tags:

Сэтгэгдэл бичих

АНХААРУУЛГА: Уншигчдын бичсэн сэтгэгдэлд FACT.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 9318-5050 утсаар хүлээн авна.