С.Баяр, Я.Содбаатар хоёрын хэн нь “манлай уяач” болох бол…

МАН-ын Удирдах зөвлөлийн гишүүд өчигдөр Төрийн ордны А танхимын гадна харуул хамгаалалт зогсоож “өндөржүүлсэн” хаалттай байдлаар хуралдлаа. Удирдах зөвлөлийн хурлаар МАН-ын генсекийн асуудал сөхөгдсөн байна.

Хамтасран Засгийн газраас АН-ынхан гарсан учраас эзэнгүйдсэн Засгийн газрын Тэргүүн шадар сайдын суудалд МАН-ын ерөнхий нарийн бичгийн дарга У.Хүрэлсүхийг нэр дэвшүүлсэн. Хэдийгээр эцсийн шийдвэр гараагүй ч Ерөнхийлөгчөөс шат алгасан самуурагч хэмээн банга хүртсэн С.Батболд, сайдад нэр дэвшигчдийнхээ нэрсийг УИХ-ын Д.Дэмбэрэлд өргөн барьсан.

Тэгээд дараахан нь УЗ-өө хуралдуулж, генсекийнхээ асуудлыг ярилцжээ. Бушуу туулай борвиндоо баастай хэмээх шүүмжийн бай болж буй төрийн эрх барих эрх бүхий Монгол ардын намынхан хүссэнээрээ хийхээр сэтгэл шулуудсан нь илт боллоо.Тймдээ ч асуудал хэрхэн шийдэгдэх нь хараахан тодорхой болоогүй байхад ийн яаравчлан хуралдсан хэрэг.

Хэрэв У.Хүрэлсүх Тэргүүн шадар сайдаар томилогдвол орны хүнийг нь яаралтай сонгох асуудал гарах нь мэдээж. Сонгууль дөхөж буй тул намын өдөр тутмын үйл ажиллагааг эмхэлж явуулдаг ерөнхий нарийн бичгийн даргын асуудлыг эртнээс ярих нь зүйтэй гэж МАН-ынхан үзсэн бололтой.

Эх сурвалжийн өгүүлсэнчлэн МАН-ын дарга, Ерөнхий сайд С.Батболд Ерөнхий нарийн бичгийн даргаа шинэ боловсон хүчнийхээ дотроос дэвшүүлэх сонирхолтой байгаа нь батлагдлаа. Тодруулбал, МАН-ын нарийн бичгийн дарга Я.Содбаатарын нэр нэлээд дээгүүр яригдаж байгаа аж. Түүнчлэн түүнтэй УИХ-ын гишүүн С.Баяр сонгуульд нэр дэвшихгүй гэдгээ мэдэгдэж, намаа ялалтад хүргэхийн төлөө ерөнхий нарийн бичгийн даргаар ажиллаж сонгуулийн менежер хийх сураг ч бас гарлаа.

Тэгэхээр өндөөр болох МАН-ын Бага хурлаар Засгийн газрын тухай бус ерөнхий нарийн бичгийн даргын болон сонгуульд нэр дэвшүүлэх зарчмын талаар ярилцах нь тодорхой болчихлоо. Өөрөөр хэлбэл Я.Содбаатар С.Баяр хоёрын хэн нь сонгуульд уяачийн үүрэг гүйцэтгэх нь тодорхойлогдоно гэсэн үг.