Баянзүрх дүүргийн цагдаа иргэнийг сөхрүүлэн суулгаж, хэрэг тулгажээ

Пүрэвдорж_bИргэн Ц.Пүрэвдорж хэвлэлийнхэнд хандлаа. Түүнд өнгөрсөн 10 дугаар сард Баянзүрх дүүргийн цагдаагийн хэлтэст залилангаар эрүүгийн хэрэг үүсгэсэн хэмээн саатуулж, мэдүүлэг авсан байна. Ингэхдээ тус цагдаагийн хэлтсийн хошууч Б иргэн Ц.Пүрэвдоржийг өмнөө сөхрүүлэн суулгаж, хэрэг хийсэн гэх бичигт гарын үсэг зурахыг хүчээр тулгасан байна. Гэхдээ Ц.Пүрэвдоржид ямар өргөдөл, гомдол ирснийг огт танилцуулаагүй гэнэ.

Ц.Пүрэвдорж нь хүнсний ногооны чиглэлээр бизнес эрхэлдэг байна. Бизнесийн шугамаар хамтран ажилласан хүнтэйгээ хоёр сая төгрөгийн маргаан үүссэн бөгөөд уг асуудал нь өдгөө залилангийн хэрэг болон хувирч, цагдаагийн албан хаагч эрүүгийн хэрэг үүсгэсэн хэмээн дарамталж эхэлснийг тэрбээр мэдээллээ. Тэгээд зогсохгүй цагдаа түүний эхнэр хүүхдийг, өндөр настай ээжийг нь дуудаж, дарамталж байгааг хэллээ.

Бизнесийн хамтрагчдын дунд үүссэн хоёр сая төгрөгийн маргаан өдгөө тус бүр зургаан сая төгрөгийн хохиролтой дөрвөн бичигт гарын үсэг зуруулснаар үргэлжилж байгаа гэнэ. Тиймээс Ц.Пүрэвдорж Баянзүрх дүүргийн прокурорт хандаж, эрүүгийн хэрэг үүсгэсэн эсэхийг лавласан байна. Харин прокурорын байгууллага “иргэн Ц.Пүрэвдоржид эрүүгийн хэрэг үүсгээгүй байна” гэсэн лавлагааг өгчээ.

Мөн тэрбээр энэ асуудлаар нийслэлийн Цагдаагийн газар гомдол гаргасан байна. Иргэн Ц.Пүрэвдорж “Цагдаагийн мафи бий болсон нь үнэн юм байна. Хоёр сая төгрөгийн асуудлыг дэвэргэж байгаа юм чинь үүнээс их мөнгөн дүнтэй бол намайг шууд шоронд хийх юм байна. Дарамталдаг, бизнесийг нь булаадаг, эрүүдэн шүүдэг нь үнэн юм байна” гэсэн мэдээллийг өглөө.

shuud.mn

http://www.shuud.mn/a/514166


URL:

Сэтгэгдэл бичих

АНХААРУУЛГА: Уншигчдын бичсэн сэтгэгдэлд FACT.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 9318-5050 утсаар хүлээн авна.