Монголын баялгаар ганцаар баяжигсад буюу З.Номундарийн ашигтай бизнес
Монгол Улсыг хичнээн баян гэдэг билээ. Ганц Оюу толгой, Таван толгой бус, түүнээс ч дутахгүй их баялгийг Монголын ард түмний ганц хувьд хүрэхгүй иргэн, гэр бүл, компани эзэмшдэг гэж бодохоор тун харамсмаар.
Тэгвэл энэ удаа бид З.Номундарь гэгч эмэгтэй Монгол Улсын байгалийн баялгийн нэлээд хэсгийг ганцаар эзэмшиж, хагартлаа баяжиж байгаа талаарх материалыг баримтаар өгүүлэхээр зэхлээ.
Өөрөөр хэлбэл З.Номундарь гэх бүсгүй Төв, Сүхбаатар, Булган, Хөвсгөл, Сэлэнгэ, Ховд, Говь-Алтай, Увс, Хэнтий, Дорнод, Дорноговь, Өвөрхангай, Баян-Өлгий, Баянхонгор, Завхан, Дундговь гэх аймгуудад алт, зэс, жонш, цайр, цагаан тугалга, нүүрсний орд газрын зуу зуун лицензийг эзэмшилдээ авч, ихэнхийг нь зарж борлуулсаар өнөөдрийг хүрсэн байна.
Хэр баргийн аавын хүү, ээжийн охины хийж чадахгүй их ажлыг амжуулж, зуу зуугаар нь ашигт малтмал, уул уурхайн ашиглах, эрж хайх лиценз эзэмшдэг энэ эмэгтэйн хэн болохыг хүн бүр л сонирхож байгаа болов уу. Харамсалтай нь З.Номундарь гэх эмэгтэй өөрийгөө ихэд нууцалдаг төдийгүй япон нөхөртэй гэхээс өөр мэдээлэл бидэнд олдсонгүй.
Тэгэхдээ бид өнөөдөр З.Номундарь гэгч эмэгтэй Монгол Улсын аль нутаг дэвсгэрт, ямар нэртэй талбайг эзэмшиж ирсэн талаарх мэдээллийг хүснэгтээр нийтэлж буй учраас уншигч та энэ эрхмийн хэн болохыг төвөггүйхэн ойлгох биз ээ.
2005-2007 он буюу лицензийг борооны дараах мөөг шиг олноор нь олгож байсан гэх он жилүүдэд манай сонины хуудаст ч багталцахааргүй их лицензийг эзэмшилдээ авсан З.Номундарь өдгөө ихэнхийг нь зарж борлуулсан гэх юм билээ. Сураг сонсох нь ээ, ганцхан ширхэг лицензийг 1-10 сая ам.доллараар зарсан байна.
Монголчуудын хувьд нэг сая доллар ч дэндүү их мөнгө учраас З.Номундарийн мэдлийн /үнэндээ эх орон, ард түмний маань баялаг/ лицензийг гадныхан хуу хамсан гэх муу мэдээ сонсогдоно лээ. Тиймээс миний нутгийн газар шорооноос бурхан гуйсан ч бүү өг гэсэн өвөг дээдсийнхээ захиасыг уландаа гишгэлсэн З.Номундариас хэн гэдэг гадаад ноёд хичнээн лиценз худалдан авав гэх асуудал хэвлэлийнхэн бидний анхаарлыг ихэд татаж эхэллээ.
Ашигт малтмалын лицензийн наймаачин гэдгээрээ алдаршсан З.Номундарь нь “Адамасмайнинг” компаниа 2002 оны нэгдүгээр сарын 17-нд байгуулж байжээ.
Уул уурхай, барилга угсралт, аялал жуулчлал, авто тээвэр, тээвэр зууч, агаарын тээвэр, орчуулгын товчоо, үнэт цаас зэрэг олон чиглэлээр үйл ажиллагаа явуулдаг “Адамасмайнинг” компани Худалдаа аж үйлдвэрийн танхимын нэрэмжит шилдэг 100 аж ахуйн нэгжийн шагналыг ч хүртэж явсан байна.
Гэхдээ түүний бизнесийн гол ажил уул уурхай, барилгын салбарт төвлөрч ирсэн нь ойлгомжтой. АМГ-аас яаж ийгээд авсан лицензүүдээ өөрөө ашиглахаасаа гадна гадныханд зарж, борлуулж, дундаас нь ашиг олдог тэрбээр элс, хайрга зэрэг байгалийн гаралтай барилгын материалыг шахаж, боломжийн хэмжээнд ашиг олдог гэх нь бий.
Мэдээж З.Номундарь гэх хэний ч үл таних энэ бүсгүй хичнээн төгрөгийн ашигтай, ямар бизнес эрхэлж байгаа нь бидэнд сонин биш боловч Монгол Улсын газар нутаг, байгалийн баялгийн ихэнхийг нийгмийн нэгхэн хувьд хүрэхгүй эдгээр хүмүүс ганцаар, аминчлан хүртэж болж байна уу гэдэг асуудлыг хөндөх нь чухал байв. Ганцаар идэж, баяжих мөрөөрөө баяжихгүй, эх орноо гадныханд их мөнгөөр худалдаж байгаа нь бас л анхаарал татахуйц харамсалтай сэдэв билээ.
Нэгэн цагт Монгол Улсын Ерөнхийлөгч “Өнөөдөр Монголын газар нутаг Монгол Улсын иргэнийх байж болно, маргааш харахад гадны иргэдийнх болчих вий дээ. Тэгвэл Монгол Улс хэлэлцээрийн ширээний ард суухдаа өөрийнхөө өмчийг гуйсан маягаар асуудалд ханддаг болно шүү дээ” гэж байв.
Ирээдүйд биш өнөөдөр ч гэсэн Монгол Улсын Засгийн газар өөрийн өмчөө гуйсан маягаар хэлэлцээрийн ширээний ард сууж буйг нуух аргагүй. Энэ бүхэнд З.Номундарь нарын эх орноо гэх сэтгэлгүй, цөөнх бүлэг ихэд нөлөөлж байгааг ард түмэн анзаарч л яваа биз ээ.
Бид дараа дараагийн дугаартаа Монголын байгалийн баялгийг хэдхэн тооны хүмүүс, хэрхэн эзэмшдэг талаар баримттайгаар хөндөх болно.
УИХ-ын гишүүдээс авахуулаад аймгийн Засаг даргаа хүртэл баялгийн эзнээр суусан тухай ичгүүргүй түүхүүдийг “Өглөөний сонин” л өгүүлэх болно.
URL:
