Нас насны эрчүүдэд яаж бэлэг сонгох вэ?

Бэлэг сонгоход тухайн хүний нас, зан араншин хоёр хамгийн чухал нөлөөг үзүүлдэг. Хүмүүс ихэвчлэн өөртөө таалагдах бэлгийг бусдад бэлэглэдэг гэлцдэг. Гэвч ингэснээр нь заримдаа нөгөө хүнийхээ сэтгэлд таарахгүй, эсвэл хэрэгцээгүй юмыг нь өгөх нь бий. Нас насны эрчүүдийн тэргүүн хэрэгцээ юу болохыг эндээс уншина уу.

Залуу насны амтыг мэдэрч яваа эрчүүдэд

Хориод насны эхэн үе дээрээ яваа залуусын толгойд хамгийн их эргэлцдэг зүйл бол одооноос хэрхэн биеэ дааж, өөрийгөө авч явж, ажлын тапбар дээр хэрхэн гарах тухай бодол байдаг. Гэвч үүнийхээ хажуугаар тэд одоо ч балчир жаалынхаа тоглож наадах хүслээс ангижраагүй байгаа. Энэ насны эрчүүдэд дуртай спортынх нь хэрэгслийг бэлэглэвэл таалагдана. Хэрвээ тэр дрифт хийх дуртай бол, зугаагаа гаргах уралдааны тоглоомон машин түүнийг баярлуулах нь лавтай.

Найз залуудаа таалагдах бэлэг сонгохын тулд яриаг нь анхааралтай сонсох хэрэгтэй. Түүнийг ихэвчлэн юуны тухай ярихдаа инээмсэглэж байгааг, юу авах тухай байн байн дурсаж байгааг нь ажиглах хэрэгтэй. Хэрэв тэр удахгүй шинэ ажлын ярилцлаганд орох гэж байгаа тухайгаа хэлвэл, өөрт нь итгэл нэмэх дэгжин хослол, эсвэл ханцуйны зүүсгэл, цэмцгэр зангиа, шинэ үзэг зэрэг нь түүнд санаа тавьдаг болохыг нь харуулна. Эсвэл тэр үргэлж л андуудтайгаа цуг цагийг хамт өнгөрөөсөн тухайгаа ярьдаг бол түүнд найзуудынх нь уулзалтыг илүү хөгжилтэй болгох покерын сет маягийн юм бэлэглэвэл зохино.

Хэрэв тэр бусдын анхаарлын төвд өртөх дургай нэгэн бол гангарааны жижиг бэлэг өгөөрэй. Чанартай асаагуур, архины чамин дашмаг, I-Pad-ны гэр, apple-ийн чихэвч гээд юу ч болж болно. Ийм насны залууст өгөх бэлэгний сонголт хязгааргүй. Учир нь тэдний өдөр тутмын хэрэглээнд, болон төлөвшихөд нь маш олон зүйл дутагдаж байдаг ба хажуугаар нь наргиан наадамаас уйдаагүй хэвээрээ байдаг.

Нэмэлт: Дөнгөж тусдаа гарч байгаа эр хүнд гэр ахуйн бараа бэлэглээрэй. Гэхдээ аяга таваг, шаазан, хутга зэрэг гал тогооны хэрэгслээс илүүтэй коктейлны хундаганы цуглуулга, зөөлөн дэр, сандлан дээрээ тавих шинэхэн хивсэнцэр зэрэг бэлэг таалагдах болно. Харин хувийнхаа карьерийн эхлэлийг тавьж байгаа залууд өдөр ажлын өдөр тутмын хэмнэлд дасан зохицоход нь хэрэгтэй бэлэг өгвөл зүгээр. Жишээ нь аяллын сахлын машин, төлөвлөгөөний дэвтэр, ухаалаг гар утас гэх мэт. Түүний амьдралын хэв маягг тохирох бэлгийг сонгоорой.

Карьертаа бүх анхаарлаа зориулагчдад

Хориод насны сүүл, гучин насны эхэн үеэр эр хүн өөрийнхөө карьерт хамгийн их анхаарал хандуулдаг. Түүний ажлыг хичнээн их дэмждэг болохоо харуулах бэлгийг сонго. Байнга томилолтоор явдаг бол бизнесийн холбогдолтой бичиг баримт, шүдний сойз, сахлын машинаа ч хийгээд явчихад болмоор оффисын цүнх авч өгөөрэй.

Эсвэл албан өрөөн дотроо хэрэглэж болох ямар нэг цаг зав, хөдөлмөрийг нь хэмнэсэн зүйл бэлэглээрэй. Байнга машин дотроо утсаар ярьдаг бол Bluetooth-ээр ажилладаг чихэвч, авсаархан багтаамж сайтай зөөврийн флаш, өөрийнхөө зургийг хэвлүүлсэн ширээний төлөвлөгөөний календарь зэргийг бодолцогтун.

Мөн энэ насны эрчүүд ажил ажил гэсээр, гэртээ бүрэн анхаарч чадахгүй болсон байдаг. Тиймээс тэдэнд авна гэж боддог ч завддаггүй гэр ахуйн эдлэл бэлэглэж болно. Тэр чиний ухаалгийг гайхах болно.

Амьдрал нь тогтворжиж яваа эрчүүдэд

30 насны сүүл, 40 насны эхэн үеэр эрчүүдийн амьдрал ихэвчлэн тогтворжсон байдаг. Тэдний өдөр тутмын хэмнэл ажил, гэр гэсэн хоёр заагт хуваагдаж эхлээд байдаг. Ажил дээрээ ч өөрийн байр сууриа олж, гэрээ ч товхинуулаад авсан тэд энэ насан дээр зугаа цэнгэл, өөртөө зарцуулах цаг заваас холдож эхлэх нь олонтаа.

Тэдэнд нэг өдөр бүтэн биеийн массажинд орох эрх, гольфийн сет, дуртай хамтлагийнх нь тоглолтын тасалбар өгвөл дуртайяа хүлээж авна. Тэдний амьдралыг сэргээж, алдагдаж эхэлсэн эрч хүчийг нь олгох бэлгийг сонгохыг бодоорой. Аль хэдийн мартсан байсан аз жаргалыг нь сануулах хэрэгтэй.

Хижээл насныханд

40-50 насны эрчүүдэд мөн л өөрийнхөө хоббинд төвлөрөх боломж олгох хэрэгтэй. Залуудаа юу хийх дуртай байсныг нь асууж байгаад бэлгээ сонго. Магадгүй тэр орцон дотор хайртай бүсгүйдээ зориулж гитар тоглож өгөх дуртай “жаал” байсан бол тэр үеийг нь эргэн санагдуулах шинэхэн гитар авч өг. Яруу найрагт дуртай ч, жил бүр болор цом үзэхээс хэтэрдэггүй бол түүнд шүлгийн өврийн дэвтэр, эсвэл ном авч өг.

Хоол хийх дуртай бол хоолны клубын эрх бэлэглэж болно. Ажил болон гэр бүлийн ачааллаас нь хөндийрүүлж, өөрийгөө хөгжөөх бололцоог гаргавал тэд туйлын ихээр талархана. Заавал өмнө нь хийдэг байсан биш, одоо шинээр сурахыг хүсдэг зүйлийг нь ч өгч болно.

Балчир хүүхэдтэй аавуудад

Аавуудын хувьд хүүхэдтэйгээ хамт хэрэглэж болох зүйлийг өгөх нь чухал байдаг. Хэрэв тэр жаахан хүүтэй бол онгоцны эвлүүлдэг модел, рубикан шоо, шатар зэргийг өгч болох юм. Тэр өөрийгөө ч хүүхдээ ч баярлуулах болно. Харин охинтой аавуудад үлгэрийн ном, юм уу охиных нь дуртай өнгийн хувцас, цамцыг бэлэглээрэй.

Эх сурвалж: “Санхүүгийн мэдээ”