Монгол бүсгүйг дэлбэлж хөнөөх захиалга өгсөн Малайзын ерөнхий сайд асанд 12 жилийн ял оноолоо
Монгол Улсын иргэн Ш.Алтантуяа агсны амийг Малайзын экс Ерөнхий сайд Нажиб Разакийн өгсөн үүрэг даалгаврын дагуу хөнөөсөн хэмээн мэдүүлсэн цагдаагийн алба хаагч Азила Хадрид холбогдох хэргийг тус улсын холбооны шүүх саяхан хэлэлцжээ. Тэрбээр Ш.Алтантуяа агсны амийг бүрэлгэсэн хэргээр шүүгдэж, цаазын ял сонссон бөгөөд захиалагчаа илчилсэн мэдүүлэг өгснөөр Малайзын шүүх түүнд ногдуулсан ялыг дахин хэлэлцэхээр ийнхүү товлосон байна. Хэрэг явдлыг нэхэн сануулбал, монгол бүсгүй Ш.Алтантуяа одоогоос 14 жилийн өмнө Малайзад хэрцгийгээр бусдын гарт амиа алдсан. Орос, Хятад зэрэг олон орны хэлээр чөлөөтэй ярьдаг орчуулагч, загвар өмсөгч Ш.Алтантуяа 2004 онд Хонконгт явж байгаад Малайз улсын иргэн Абдул Разак Багинда гэгчтэй танилцаж байжээ. Тухайн үед Малайз улс усан хилээ хамгаалах зорилгоор шинээр шумбагч хөлөг авах шаардлага гарч, Абдул Разак Багинда болон түүний холбоотон Нажиб Разак нар Оросоос хөлөг онгоц худалдан авахдаа улсаас мөнгө шамшигдуулах санаа агуулж байжээ. Шумбагч хөлөг худалдан авах гэрээ Францад нууцаар болж, удалгүй хэргийн гол гэрч болох гэрээний орчуулагчаар ажилласан монгол эмэгтэй Ш.Алтантуяагийн цогцос аймшигтай зэрэмдэглүүлсэн байдалтай Малайзын Селенгор мужийн нэгэн ойгоос олдсон юм. Талийгаач бүсгүйн толгойд нь буудан, цэрэг армийн зориулалтаар ашигладаг С4 хэмээх тэсрэх бөмбөг биед нь бэхэлж дэлбэлсэн байсан бөгөөд биеэс нэг ч бүтэн хэсэг үлдээгүй байжээ. Эл хэрэг явдал гарахын өмнө Ш.Алтантуяа орчуулгын хөлс болох 500 мянган ам.доллараа авахыг хүсэж Багиндад хандахад үл зөвшөөрчээ. Хамгийн сүүлд Багиндатай уулзаж, ажлын хөлсөө авахаар түүний гэр рүү таксигаар хүргүүлэн очиход нь Багиндагийн хүмүүс түүнийг хүчээр машиндаа суулган авч явсан байна. Энэ бүхнийг харсан таксины жолооч машины марк, дугаарыг цагдаад мэдэгдсэнээр бүсгүйг эрэн хайх ажиллагаа эхэлжээ. Хэд хоногийн дараа Селенгорын нэгэн ойгоос хүний цогцосны үлдэгдэл олдсон нь талийгаачийнх гэдэг нь нотлогдсон байдаг. Эл хэргийн үнэн, мөнийг тогтоолгох гэж талийгаачийн аав С.Шаарийбуу олон жил хөөцөлдөж буй ч үр дүнд хүрэлгүй өдий хүрсэн. Харин тус улсад өнгөрсөн жил болсон сонгуулийн дараа гарч ирсэн эрх баригчид энэ хэргийг эзэн хааны архиваас гарган сэргээн шалгуулах болсноор халаагаа өгөөд удаагүй байгаа Малайзын Ерөнхий сайд Нажиб Разак тэргүүтнийг шүүхийн өмнө авчраад буй юм. Хэрэг гарсан 2006 онд Нажиб Разак тус улсын Ерөнхий сайд болон Батлан хамгаалах яамны сайдын албан тушаалыг давхар хашиж байв. Улмаар энэ үедээ биеэр уулзаж Ш.Алтантуяаг буудахыг даалгаад, “Гаднаас ирсэн аюултай тагнуул” хэмээсэн гэдгийг Азила Хадри илчилсэн нь Малайзад дуулиан тарьсан билээ. 2009 онд уг хэрэгт холбогдуулан цагдаагийн офицер Азила Хадри, Сирул Азхар Умар гэсэн хоёр хүнийг буруутгаж, цаазын ял оноосон. Тэдний хамт шалгагдсан гуравдагч этгээд болох Абдул Разак Багинда нотлох баримт хангалтгүй гэх шалтгаанаар ялаас мултарч, цагаадаж байв. Аллагыг гүйцэтгэсэн Азила Хадри Малайзын Ерөнхий сайд асан Нажиб Разакт холбогдох зүйлсийг мэдүүлэхдээ “Өөрийнх нь амь насанд заналхийлж буй Куалалумпурт суугаа гадаадын тагнуул эмэгтэйн амийг хөнөөж, цогцосыг нь үгүй хийх, үүнийгээ маш чанд нууцлал дор гүйцэтгэх даалгаврыг өгсөн” гэжээ. Ингээд цагдаагийн албаны зэвсгийн агуулгаас тэсрэх бодисоор хангаж байсан гэнэ. Малайзын Ерөнхий сайд асан Нажиб Разакийн хувьд Ш.Алтантуяагийн хэрэгт өөрийгөө холбоогүй хэмээн мэдүүлээд байгаа ч Нажиб Разакийг саяхан шүүж, Малайзын шүүхээс 12 жилийн ял оноолоо. Гэхдээ энэ ял нь түүний зөвхөн авлигын хэрэгт хамааралтай гэх бөгөөд үргэлжлүүлэн Ш.Алтантуяагийн амь насыг хөнөөсөн асуудлыг ч мөн шүүхээр болжээ.
Одоогоор экс Ерөнхий сайд Нажиб Разакийг Малайзын ард түмэнд очих учиртай байсан хэдэн тэрбум долларыг хувьдаа завшсан хэрэгт буруутгажээ. Энэ их мөнгөний нэлээд хэсэг нь түүний хувийн байшин, үл хөдлөх газар, хувийн онгоц, уран зураг, тэрг бүү хэл Холливудын кино хүртэл ивээн тэтгэж баярхжээ. Ийнхүү арав гаруй жил үргэлжилж буй монгол бүсгүйн амийг хөнөөсөн хэрэг ч нааштай шийдэгдэх нь. Хэдийгээр тэрээр монгол бүсгүйн амь насыг хөнөөх захиалга өгөөгүй гэж мэдүүлсэн ч маш олон нотлох баримтаар өгсөн нь батлагдаж байгаа гэнэ.
URL:
