Г.Тэмүүлэн гишүүн ээ, саун, массажны газар жижиг, дунд үйлдвэрлэл мөн үү…

Жирийн иргэдийн боломжийг эрх мэдэл, албан тушаал, мэдээлэлд ойр мөн өөрийн болон хамаарал бүхий этгээдүүдээрээ дамжуулан авч, завшсан цагаан захтнуудын ичгүүргүй хэрэг илчлэгдээд хоёр орчим жил өнгөрчээ. Бид энэ талаар нэхэн сурвалжилж, цувралаар хүргэсээр байгаа билээ.

Өнөөдрийн байдлаар холбогдох албаны мэдээлж буйгаар тухайн үед УИХ-ын 16 гишүүн, гурван сайд, нэг дэд сайд ЖДҮХС-гаас зээл авсан нь тодорхой болсон байдаг. Гэвч эдгээр албан тушаалтнаас өнгөрөгч парламентын сонгуульд есөн гишүүн нэр дэвшиж, зургаа нь ялалт байгуулан өдгөө парламентын танхимд хууль тогтоох үйл ажиллагаанд оролцож, энгийн иргэд биднийг төрд төлөөлж сууна. Энэ нь хэр шударга явдал вэ?

Бид энэ удаад УИХ-ын гишүүн Г.Тэмүүлэнг онцлон хүргэж байна. Тэрбээр хамаарал бүхий этгээд буюу ээж Довдон овогтой Дэнсмаагийнх нь Спа цогцолбор ХХК тус сангаас 700 сая төгрөгийн зээл авсан байдаг. Тус цогцолбор нь 3,4 дүгээр хорооллын эцэст байрладаг Говь саун-ыг эзэмшдэг компани юм.

Харин түүний хүү эрхэм гишүүнтэн гуай зөөлөн сэнтийдээ дахин заларч, иргэдэд хууль дүрэм, ёс суртахуун ярьж сууна. Гэтэл одоогийн байдлаар 1579 аж ахуйн нэгж 238 тэрбум төгрөгийн зээл авах хүсэлтээ илгээгээд байна. Тэдний 1400 орчим нь буюу 89 хувь нь 300 хүртэл сая төгрөг хүссэн бичил бизнес эрхлэгчид бий гэсэн тооцоог холбогдох албанаас гаргажээ. Өөрөөр хэлбэл, энэхүү үзүүлэлт нь ЖДҮХС-гаас УИХ-ын ганцхан гишүүний албан тушаал, эрх мэдлээ ашиглан авсан зээлээс гурав дахин бага мөнгө билээ.

Эцэст нь хэлэхэд, жилийн гурван хувийн хүүтэй, таван жилийн хугацаатай 700 сая төгрөгийн зээл авахад УИХ-ын гишүүн Г.Тэмүүлэн албан тушаал, эрх мэдлээрээ нөлөөлсөн үү гэх асуулт урган гаргана. Жижиг дунд үйлдвэрийг хөгжүүлэх сангаас зээл авсан гишүүдийн нэгэн адил Г.Тэмүүлэн нөлөөлөөгүй хэмээн хариулсаар ирсэн. Гэхдээ хамгийн гол асуудал нь саун, массажны газар жижиг, дунд үйлдвэрлэл мөн үү