Ч.Ундрам гишүүн ээ, Хөгжлийн банкнаас авсан 4.5 тэрбум төгрөгийн өрөө ТӨЛ

Нэр төрөө эрхэмлэдэг УИХ-ын гишүүн Ч.Ундрам Хөгжлийн банкнаас аавынхаа компаниар дамжуулан зээл авснаа юу гэж тайлбарлах бол гэж олон нийт сонирхож байна.

Хэдийгээр Ч.Ундрам зээлийг өөрийнхөө нэр дээр аваагүй ч түүний хамаарал бүхий тэр тусмаа түүний аав Чойжамц овогтой Чинбатын  “Вояжер минерал ресурсес” ХХК 4.5 тэрбум төгрөгийн зээл авсан нь ийнхүү Ч.Ундрам гишүүнд хамааралтай гэсэн үг.

Тэрбээр АТГ-т гаргаж өгсөн хөрөнгө орлогын мэдүүлэгтээ аавынхаа компанийг дурдалгүй “Малтикс”, “Хөнгөн бетон”, “Дизель транс” гэх компаниудыг гэр бүлийн хамтаар 50 хувь эзэмшдэг гэж мэдүүлсэн байдаг. Харин мань хатагтай Барилгын засвар, гадаад худалдаа, лангуу түрээсийн чиглэлээр үйл ажиллагаа явуулдаг “Саруул шилтгээн констракшн” компанийнхаа  хамтран хувь эзэмшигчээр аав Ч.Чинбатыгаа хамтардаг гэж ХОМ-тээ дурдсан.

Тэгвэл улстөрд эртнээс орохоор зэхэж байсан Ч.Ундрам Хөгжлийн банкнаас зээл авсан аавынхаа “Вояжер минерал ресурсес” ХХК-ийг олноос нууцалж нэр цэвэр байлгахыг эрхэмлэжээ гэж харагдаж байна.

Мэдээж Ч.Ундрам гишүүн ХОМ-ын мэдүүлэгтээ дээрх компаниудыг дурдсан ч гэлээ түүний хамаарал бүхий хувь эзэмшдэг нэлээд компаниуд мөнгө болох боломжтой бүхий л салбарт ургийн мод шиг салаалсан тухай мэдээллийг дараагийн удаа мэдээлэх учраас энэ удаад нуршаад хэрэггүй биз.

Учир нь УИХ-ын 2020 оны сонгуульд түүнийг нэр дэвшихэд хамгийн их мөнгө хаясан хүн нь түүний аав Ч.Чинбат гэдгийг Сэлэнгэчүүд хийгээд Монголын ард түмэн мэднэ.

Нууц юм гэж хэзээ ч байдаггүй хойно нэр төрийг дээгүүрт тавьдаг Ч.Ундрам гэх гишүүн өдгөө үнэнд гүйцэгдсэн тул энэхүү дээрэм тонуулаа хэрхэн яаж тайлбарлахыг нь олон нийт хүлээж, хүсч байна.

Мөн Ч.Ундрам гишүүнтэй холбоотой асуудал хэвлэлээр гарах тоолонд түүний ажлын албаныхан утас цохиж гишүүнийхээ нэр хүндийг хамгаалж тайлбар өгдөг хэрнээ энэ удаа таг дуугүй суугаа нь ч  хачирхалтай.

Улсаа хөгжүүлэх гэсэн банкийг Ч.Ундрамын эцэг Чойжамц овогтой Чинбат ийнхүү дампууруулчхаад байхад тэрбээр өдгөө УИХ-ын чуулганы танхимд хууль батлалцаж, төсөв мөнгө хэлэлцэж суугаа нь үнэнээс хол зөрж буйг харуулж байна.

Нөгөөтэйгүүр улсыг хохироон байж зээл авсан Ч.Чинбат Хөгжлийн банкны 4.5 тэрбум төгрөгөөр охиндоо УИХ-ын гишүүний суудал авч өгчээ гэхэд дэгстсэн болохгүй биз ээ.

Мөн өнөөдөр Ч.Ундрам шиг шударга дүр эсгэж Монголын ард түмний чихэн дээр цэцэг ургуулж суугаа олон гишүүд бий гэдгийг сонгогчид мартаж болохгүй.

Тэгээд ч  “Ч.Ундрам гишүүн та шударгын дүр эсгэж байхаар улсаа хохиролгүй болгочхоод УИХ-ын танхимд нүүр бардам, дуу цолгиун  дуугарч суу” гэж ард түмэн чинь дамжуулж буйг ийнхүү уламжилж байна.

http://erennews.mn/article/52796