Герман 120 хоногийн дотор Оросоос нүүрс импортлохоо зогсооно гэж мэдэгдэв

712-1649404793624fe82a80bd0БЕРЛИН. /Reuters/. ОХУ-ын эсрэг ЕХ-ны тав дахь багц хориг арга хэмжээнд заасан хугацаа болох Оросоос нүүрсний импортыг хориглох дөрвөн сарын шилжилтийн үеийг Герман улс бүрэн ашиглана гэж Канцлер Олаф Шольц пүрэв гарагт 16 мужийнхаа ерөнхий сайд нартай уулзсаны дараа мэдэгджээ.

Тэрбээр мөн ЕХ-ны тав дахь удаагийн хориг арга хэмжээг “дараагийн том, шийдэмгий алхам” гэж тодорхойлов.
Өмнө нь ХБНГУ-ын дэд канцлер, Эдийн засаг, уур амьсгалыг хамгаалах асуудал эрхэлсэн сайд Роберт Хабек хэвлэлийн бага хурлын үеэр хэлэхдээ, Герман Оросын эрчим хүчний эх үүсвэрээс хараат байдлаа бууруулах алхмуудыг дэс дараатай хэрэгжүүлж байна гэсэн юм.
Европын Холбооны орнуудын Элчин сайд нар ОХУ-ын эсрэг тав дахь багц хориг арга хэмжээг пүрэв гарагт баталжээ. Хориг арга хэмжээний багцад хувь хүмүүс болон санхүүгийн байгууллагуудад хязгаарлалт тавих, ОХУ-аас нүүрс импортлох, өндөр технологийн бараа нийлүүлэхийг хориглох зэрэг арга хэмжээ багтсан байна. Хоригт өртсөн экспортын бараа бүтээгдэхүүний хэмжээг 10 тэрбум евро гэж тооцож байгаа бол “түүхий эд, чухал материал”-ын импортын хязгаарлалт нь 5.5 тэрбум еврогийн үнэ бүхий бараанд нөлөөлнө. Түүнчлэн ОХУ-ын далбаатай хөлөг онгоцуудыг Европын орнуудын боомтоор нэвтрүүлэхийг хориглож, ОХУ, Беларусийн тээврийн компаниуд ЕХ-ны нутаг дэвсгэрт үйл ажиллагаа явуулах боломжгүй болно.
Д.Жаргал
Эх сурвалж: Монцамэ агентлаг


URL: