Жолооны эрхээ хасуулсан жолооч шалгалт өгөхгүй
Жолооны эрхээ хасуулсан иргэд дахин сургалт, шалгалт өгөх шаардлагагүй болсон гэдгийг албаныхан мэдээллээ. Ингэснээр жолооны эрх хассан хугацаа дуусмагц автоматаар сэргэх юм. Энэ шийдвэр 2025 оны 2 дугаар сарын 13-ны өдрөөс хэрэгжиж эхэлжээ. Тодруулбал, Хууль зүй, дотоод хэргийн сайд О.Алтангэрэлийн 2025 оны хоёрдугаар сарын 13-ны өдрийн А/46 гэсэн тушаалаар Эрх сэргээх, дуусгавар болгох журмыг хүчингүй болгосон байна. Уг журмаар зохицуулж байсан жолооны эрхийн хугацаа дууссан тохиолдолд төрийн бус байгууллагын сургалтад хамрагдаж, эрхээ сэлгээх нь зохицуулалт хүчингүй болж, Замын хөдөлгөөний аюулгүй байдлын тухай хуульд зааснаар жолооны эрхийг автоматаар сэргээхээр болжээ.Зөвшөөрлийн тухай хуульд нийцүүлэн Хууль зүй, дотоод хэргийн сайдын 2025 оны хоёрдугаар сарын 13-ны өдрийн тушаалаар дараах тушаал, журмыг тус тус хүчингүй болгож, Захиргааны хэм хэмжээний актын нэгдсэн сангаас хассан.
- А/45 тушаалын дагуу Хууль зүй, дотоод хэргийн сайдын 2017 оны А/292 дугаартай “Тээврийн хэрэгсэлд тусгай дуут болон гэрлэн дохио тавьж хэрэглэх журам шинэчлэн батлах тухай” тушаалыг;
- А/46 тушаалын дагуу Хууль зүй, дотоод хэргийн сайдын 2018 оны А/142 дугаартай “Тээврийн хэрэгсэл жолоодох эрх дуусгавар болох, тээврийн хэрэгсэл жолоодох эрхийг сэргээх журам батлах тухай” тушаалыг;
- А/47 тушаалын дагуу “Журам, загвар батлах, үнэ тогтоох тухай” Хууль зүйн сайдын 2015 оны А/189 дүгээр тушаалын нэгдүгээр хавсралтаар баталсан “Жолоодох эрхийн үнэмлэх олгох журам”
- 1/882 албан бичгээр Тагнуулын ерөнхий газар, Гаалийн ерөнхий газар, Цагдаагийн ерөнхий газрын дарга нарын 2017 оны А/52, А/148, А/123 дугаартай “Тусгай хэрэгслийг үйлдвэрлэх, дууриалган хийх, гадаад улсаас оруулж ирэх зөвшөөрөл олгох журам” хамтарсан тушаалыг хүчингүй болгох арга хэмжээ авах талаар;
- 1/883 албан бичгээр Хууль зүйн сайд, Сангийн сайдын 2015 оны А/251, 304 дугаартай “Галт зэвсэг, сум, галт зэвсэгтэй адилтгах хэрэгсэл импортлох, худалдах болон спорт-сургалтын үйл ажиллагаа эрхлэх тусгай зөвшөөрөлтэй иргэн, хуулийн этгээд галт зэвсэг, сум, галт зэвсэгтэй адилтгах хэрэгслийг улсын хилээр нэвтрүүлэх журам” хамтарсан тушаалыг хүчингүй болгох тухай;
- 1/884 албан бичгээр “Журам батлах тухай” Хөдөлмөр, нийгмийн хамгааллын сайд, Хууль зүй, дотоод хэргийн сайдын 2019 оны А/46, А/09 дүгээр хамтарсан тушаалын нэгдүгээр хавсралтаар баталсан “Жолоодох эрхийн шалгалтын төвийн үйл ажиллагааны журам”-ыг хүчингүй болгох тухай.
Жолооны эрхээ хасуулсан иргэд Тээврийн цагдаагийн албаны ЦЕГ-н Бүртгэл хяналтын төв дээр болон “Дүнжингарав” худалдааны төвд байрлах нэг цэгийн үйлчилгээний төвд иргэний үнэмлэхтэйгээ өөрийн биеэр очиж, жолоочийн эрх сэргээлгэх лавлагаа авдаг байсан. Лавлагааг иргэнд өгөхдөө тухайн иргэний гэрэл зураг болон иргэний үнэмлэхийн зургийг авна. Энэхүү лавлагааг авснаар жолооч цахимаар шалгалт өгөх эрх нь автоматаар нээгдэнэ. Харин эрхээ хасуулсан жолооч нар эрүүл мэндийн хуудас бөглөнө, Шинэ жолооны үнэмлэхийн мөнгө тушааснаар цахим шалгалтад орох эрхтэй болдог байсан юм.
URL:
