МУИС-ийг улстөржүүлсэн С.Мөнхбат багш нараар МАН-ын судалгааг хийлгэжээ
-С.МӨНХБАТЫН “МАКС ЧАДВАР” ТББ-ЫН ЗАХИАЛГААР МАН-ЫН СУДАЛГАА ХИЙЖ ЯВСАН БАГШ НАР ОСОЛД ОРЖ ГУРВАН ХҮН АМИА АЛДСАН ЮМ-
МАН-ын судалгаагаар орон нутагт явж байсан баг зам тээврийн осолд орж гурван хүн амиа алдсан харамсалтай хэрэг энэ сарын 7-нд гарсан билээ. “МАН-ын судалгаа биш. Улстөржүүлж байна. Төрийн бус байгууллагын захиалгаар нийгмийн сэтгэл зүйг судалж явсан юм” гэх мэтчилэн МАН-ынхан МУИС-ийн зарим багш нараар мэдээлэл авч, өөрсдийгөө буруугүй мэтээр залруулга ч тарааж байлаа. Гэвч бодит байдал дээр багш нар МАН-ын дэргэдэх Нийгмийн ардчиллын хүрээлэнгийн захиалгаар иргэд ирэх сонгуульд аль улс төрийн хүчинд санал өгөхийг судалж явсан байна. Багш нартай хамтран ажиллах гэрээ байгуулсан гэх “Макс чадвар” төрийн бус байгууллагын талаар судлахад багш нар МАН-ын захиалгаар, Нийгмийн ардчилал хүрээлэнгийн санхүүжилтээр ажиллаж байсан нь тодорхой болсон юм.
С.МӨНХБАТ МУИС-Д МАН-ЫН “БҮЛЭГ” БАЙГУУЛСАН НЬ
Улс төрийн намууд судалгаа хийлгэхдээ хувь хүнтэй гэрээ байгуулдаггүй. Тиймээс судлаачид, багш нар хэд, хэдээрээ нэгдэж төрийн бус байгууллага байгуулан намаас санхүүжилт авч ажилладаг аж. Гэхдээ төрийн бус байгууллагын гишүүд хэрхэн яаж ажиллаж, хэнтэй хамтарч, хэний төлөө ажиллаж байгаагаа задлах ёсгүй. Ийм маягаар томоохон их дээд сургуулийн багш нар ажлынхаа хажуугаар давхар ажил хийдэг юм байна. Ингэж хамтарч ажиллахдаа бас улстөржиж, дотооддоо хор найруулдаг гэнэ. МУИС-ийн тухайд л гэхэд багш нар нь үндсэн ажлаасаа гадна улстөржиж, нам эвсэлд үйлчлэх гэдэг том үүрэгтэй. Нам дагасан нэгэндээ тал засч, харцаар нь хөдөлбөл албан тушаал ахих магадлалтай байдаг гэнэ.
Тус сургуулийн Нийгмийн шинжлэх ухааны сургуулийн дэд захирал, сургалтын албаны даргаар ажиллаж байсан С.Мөнхбат МАН-ын дэргэдэх Нийгмийн ардчиллын хүрээлэнгийн захирлаар томилогдсоноос хойш намынхаа “бүлэг”-ийг байгуулсан талаар багш нар ярьж байсан. Багш нарын яриагаар С.Мөнхбат сургуулийнхаа багш Г.Лодой, Ж.Төртогтох нартай тохиролцон Г.Эрдэнэбаярыг Нийгмийн шинжлэх ухааны сургуулийн захирлаар сонгуулсан байна. Дараа нь Ж.Төртогтохыгоо Улс төрийн тэнхимийн эрдэмтдийн зөвлөлд оруулж, нарийн бичгийн даргаар нь томилуулжээ. Багш нар дээрх дөрвөн багшийг “МУИС дахь МАН-ын бүлэг” гэцгээдэг юм билээ. С.Мөнхбат, Ж.Төртогтох нар өөрсдийг нь дэмжсэн Г.Лодой багшийн хүүг “Макс чадвар” судалгааны багтаа авсан байна. Харамсалтай нь Г.Лодой багшийн хүү МАН-ын судалгааг хийж яваад осолджээ. “Макс чадвар” төрийн бус байгууллагыг С.Мөнхбат хэрхэн байгуулж байсан талаарх баримт байна.
“МАКС ЧАДВАР“ ТББ-ЫГ ХЭРХЭН БАЙГУУЛАВ
Багш, судлаачид хамтран төрийн бус байгууллага байгуулан намаас санхүүжилт авдаг талаар дээр өгүүлсэн. С.Мөнхбат, Ж.Төртогтох нар ч “Макс чадвар” нэртэй төрийн бус байгууллага байгуулж, МАН-аас санхүүжилт аван ажилладаг байжээ. Тус төрийн бус байгууллагад Г.Лодой багшийн хүүгээс гадна талийгаач А.Алтангэрэл, С.Дугарсэд нарын багш нар багтдаг байсан аж. Мөн одоо бие нь тааруу байгаа МУИС-ийн багш Н.Батболд ч С.Мөнхбаттай нэг баг болон ажилладаг гэнэ. Гэхдээ С.Мөнхбат “Макс чадвар”-ын МАН-ын судалгааны баг гэж мэдэгдэхгүйн тулд өөрөөсөө холдуулахыг оролдсон байна. Учир нь “Макс чадвар” төрийн бус байгууллагын үүсгэн байгуулагч нь Дашдоржийн Оюунгэрэл. Д.Оюунгэрэл нь С.Мөнхбатын гэргий аж. Тэрбээр ХААИС-д хоёр жил багшлаад саяхнаас МУИС-ийн Нийгмийн шинжлэх ухааны сургуулийн Философийн тэнхимд багшилж байгаа юм. Тэгэхээр С.Мөнхбат эхнэрийнхээ нэр дээр төрийн бус байгууллага байгуулж МАН-ын санхүүжилтээр багш нараар судалгаа хийлгэж байжээ. Ерөнхийдөө улс төр судлаач, нийгмийн салбарын гол боловсон хүчин бэлтгэдэг гэх МУИС-ийн Нийгмийн шинжлэх ухааны сургууль МАН-ын сектор маягаар ажилладаг болоод удаж байгаа гэнэ. Тус сургуульд сурах нь МАН-д элссэнтэй адил. Оюутнууд нь “Макс чадвар”-ынхантай МАН-ын судалгааг хийж яваад амиа алдсан нь үүний нотолгоо.
МАН-ЫН ЗАХИАЛГААР БАГШ НАР ЮУ СУДЛАВ
“Макс чадвар” ТББ-ын захиалгаар гэх судалгааг 21 аймаг, есөн дүүрэгт хийх байжээ. Судалгааны санхүүжилт, хамрах хүрээ ч нэлээд өргөн аж. Нийгмийн ардчиллын хүрээлэнгээс санхүүжүүлсэн сонгуулийн өмнөх дорвитой судалгаануудынх нь нэг байжээ. Голчлон улс төрийн нам хүчнүүдийн талаар олон нийтийн санаа бодлыг тандах зорилготой асуулгууд бэлтгэсэн байх юм. Тухайлбал, аль улс төрийн хүчинд саналаа өгөх вэ. 2012 оны сонгуульд улс төрийн аль хүчин ялна гэж бодож байна вэ, улс төрийн хүчнүүдээс алийг нь дэмжиж байна вэ гэх зэрэг асуултуудад хариулт авах зорилготой юм байна. Бодит байдал ийм байхад Нийгмийн ардчилал хүрээлэнгийн захирал С.Мөнхбат “МУИС-ийн Улс төрийн тэнхимийнхэн “Макс чадвар” төрийн бус байгууллагатай хамтран ажиллах гэрээний дагуу хийж байсан судалгаа юм билээ. Гэтэл үүнийг манай хүрээлэнгийн захиалгаар хийж байсан ажил гэж байгаад харамсч байна” гэсэн байх юм.
СОНГУУЛЬ БҮРЭЭР МАН ХҮНИЙ “АМИНД ХҮРДЭГ” ЖИШИГ ТОГТЛОО
УИХ-ын сонгуулийн үеэр МАН-тай хамааралтай хүн амиа алддаг жишиг тогтоод удлаа. УИХ-ын 2004 оны сонгуулийн өмнө МАХН (МАН) Сүхбаатарын талбай дээр том шоу зохион байгуулж байлаа. Урлаг соёлын оддыг цуглуулж, иргэдийг намдаа уриалсан том шоуных нь үеэр дөнгөж амьдралд хөл тавьж буй залуу амиа алдсан. Талийгаачийн эгч “МАХН шоу хийгээгүй бол миний дүү амьд байх байсан” гэж манай сонинд ярилцлага өгч байв.
УИХ-ын 2008 оны сонгуулийн үеэр юу болсныг иргэд мэдэж байгаа. Харин УИХ-ын 2012 оны сонгуулийн өмнө МАН-ын нэр хүнд иргэдийн дунд хэр байгааг судалж явсан 30-31 насны гурван залуу харамсалтайгаар амиа алдлаа. Энэ МАН яасан муу ёртой юм бэ.
Ц.ӨРНӨХ
Өдрийн сонин
URL:
