Г.Алтан хатагтайн хэзээ ч худалдахгүй зүйл

Монголын өнөө цагийн баячуудын нэг “Алтжин”-гийн Г.Алтангийн хөөрөгний цуглуулганы талаар хүмүүс тэр бүр мэддэггүй биз ээ. Тэрбээр үнэт чулуугаар хийсэн, уран чамин хийц­тэй, юм мэддэг хүний харцыг булааж, шуналыг хөдөлгөсөн нэлээд хэдэн хөөрөгтэй. Түүний энэхүү цуглуулгад XVII, XVIII зууны үеэс уламжлагдаж ирсэн хоёр шүрэн хөөрөг бий.

Асар нарийн хийцтэй, эртний хөөрөгний нэгийг нь цуглуулагчид “Хатагтай” хэмээн нэрийддэг байна. Харин нөгөө нь XVIII зууны үеийн түүх соёлын дурсгалд хамаарагдах бөгөөд цул шүрийг ухаж, давхар бумба хэлбэртэй хоёр хөөрөг болгоод навч, жимс тэргүүтнээр чимэглэсэн нандин хийцтэй хөөрөг аж.

Хоёр хөөргийг харсан бүхний шүлс гоождог ч Г.Алтан хатагтай энэхүү нандин цуглуулгаа сайн нөхөд, гадна, дотны эрхэм хүндтэй зочдоосоо нуугаад байдаггүй.

Зоосон тамгатай, эртний хээ угалзан чимэглэлтэй пийсүү хөөрөг ч мөн түүний цуглуулгад үнэтэй байр суурь эзэлдэг. Түүний цуглуулгад ихэвчлэн уран дархчуулын гар болоод оюуны ур шингэсэн, эрт­ний хөөрөгнүүд байдаг. Тухайлбал, дундад зууны үеэс уламжлагдан ирсэн, бухын дүрстэй мана хөөрөг түүний нандин цуглуулгын бас нэгэн чамин чимэг болдог.

Г.Алтан хатагтай хү­мүүст хөөрөгний цуг­луул­гаа хааяа нэг сонирхуулах боловч “Ямар ч өндөр үнээр ху­дал­дахгүй хамгийн эрхэм зүйлсийн маань нэг бол энэ цуглуулга. Тиймээс би ганцыг нь ч зарахгүй” хэмээдэг байна.

Эх сурвалж: “Өглөөний сонин”