Ганц ойртуулснаа юу гэж бодоод байгаа юм бол

Ганц ойртуулснаа юу гэж бодоод байгаа юм бэ гэх үгийг шинэчлэлийн гэг­дэх засгийн газарт орсон Ардчилсан нам, МАХН-МҮАН-ын “Шударга ёс” эвс­лийн­хэн бие биедээ чулуудах л үлд­лээ.

Засаг төрөө маш богино хугацаанд түргэн шуур­хай бүрдүүлж, мөрийн хөтөл­бөрөө хэрэгжүүлэх ажлаа шуурхайлъя гээд Улсын баяр наадмын өмнө хам хум анхдугаар чуулганаа хийсэн УИХ хоёр сарын турш дуншиж байж арайхийж Зас­гийн газрын гишүүдээ уван цуван томилсон боллоо. Засагт багтсан нам эвслүүд УИХ-ынхаа гишүүдэд ямар нэгэн албан тушаал өгч, амыг нь хааж дөнгөсөн ч тойргийн гадна байгаа гишүүд дэмжигчдээ хэрхэн яаж ажил албатай болгох вэ гэж толгойгоо гашилгаж сууна.

Хүчтэй цөөнх гэг­дэж байгаа МАН-ыг элдэв янзын хуулийн тайл­бараар олонхын хүчээр дарангуйлж чадаж байгаа боловч эвсэлд орсон нам хүч­нүүдийнхээ өмнө АН арга­гүй л “хүчгүйдэж” байна. Ямар сайндаа нам эвслийн бүлгүүдийн ээлжит бус хурлуудад дарагдаж, зөвшилцөөн нэрийн дор элдэв янзын шахалт шаардлагыг бие биедээ тавьсаар цаг хугацааг өнгөрөөж байна.

МАН-ыг гар нийлэн доош хийж чадсан ч Монгол Улсыг хөгжүүлэхийн төлөө сэтгэл нийлэн ажил­лах ирээдүй энэ эвсэлд харагдахгүй л байгаа юм. Тодруулж хэлбэл, албан тушаалын хуваарилалт дээр баахан хүний “зодоон” үүсгэ­чихээд намжааж чадах­гүй балмагдаж байгаа эрх баригчид одоо хэр нь дэд сайд, Төрийн нарийн бичгийн даргаа тод­­руулж чадахгүй шокийн байдалтай байна.

Нэг асуудлыг ший­дэх гэхээр ямар ч холбог­долгүй нөгөө асуудлыг сөргүүлэн тавьж бойкотолдог гэм Мон­­голын төрд гүнзгий суужээ. Н.Энх­баяр, М.Энх­сайхан нарыг Засгийн газрын бүрэл­дэхүүнд оруулахгүй бол эвсэхгүй гэж нэг хэсэг “Шударга ёс” эвсэл бойко­тол­сон.

Шүүхээс Н.Энхбаярт дөрвөн жилийн хорих ял оноосонд “Шударга ёс” эвслийн удирдлагууд гомор­хож, засгаас гарна гэж айл­гасан. Одоо болохоор нам эвслийн бүлгүүд УИХ-д завсар­лага авахыг хуга­цаатай болгох тухай асуудлыг “Шударга ёс” эвслээс дэмжихгүй бол манай нам нэр дэвш­сэн дэд сайд нарыг бат­лахгүй гэж АН-аас шахсан сурагтай. Ингэж тэгж нааш цааш бөмбөг өнхрүүлсээр бай­тал намрын ажлаа барж амжилгүй өвлийн сартай золгож мэдэх нь.

Ёстой л засаг хамтарч барья гэж ганц удаа ойр­туул­сан биш салж ч болдоггүй, нийлж ч бол­доггүй нойтон хамуу шиг нөхөдтэй зууралд­санаа АН-ынхан одоо л ойлгож байх шиг.


URL:

Сэтгэгдэл бичих

АНХААРУУЛГА: Уншигчдын бичсэн сэтгэгдэлд FACT.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 9318-5050 утсаар хүлээн авна.