У.Хүрэлсүх УИХ-ын гишүүнээс нэрээ татсан бололтой

2012 оны УИХ-ын сонгуулиар МАН-аас жагсаалтын хоёрт нэрээ бичүүлж УИХ-д суудал авсан УИХ-ын гишүүн У.Хүрэлсүх парламентын гишүүний суудлаасаа татгалзсан талаар эх сурвалж мэдээллээ.

Тэрбээр, УИХ-ын даргад өргөдлөө өгсөн бөгөөд түүний оронд намын жагсаалтын 10-т жагсч, урдуураа таслуулсан МАН-ын нарийн бичгийн дарга Д.Сарангэрэл орж ирэхээр болсон бололтой.

Сүүлийн үед түүнийг Ерөнхийлөгчийн сонгуульд нэр дэвших болсон талаар яригдаж байгаа ч УИХ-ын гишүүн Г.Баярсайхантай Төрийн ордонд зодолдсон учраас эрүүгийн хэрэг үүсгэсэн гэсэн мэдээлэл байгаа юм.

Түүний сонголтыг хүмүүс зөв гэж үзэж байгаа бөгөөд УИХ-ын гишүүний ажил бус намын дотоод ажилдаа анхаарал хандуулах нь илүү үр дүнтэй гэж дүгнэх болсон ажээ.

Б.Тогтох