Умард Солонгосчууд шар айраг ууж, галзуу хулгана дээр тоглоно

Бүгд Найрамдах Ардчилсан Солонгос Ард Улс буюу Умард Солонгос улс гэхээр хатуу чанд дэг жаяг, коммунист дэглэм, улс төрийн нэг намт тогтолцоо, хаалттай соёл санаанд буудаг. Дэлхий дахины сонсож байгаа хөгжим, үзэж байгаа кино, клип, эдэлж хэрэглэж байгаа бүхний эрх баригчдын шүүлтүүрээр орсон байдлаар үзэж сонирхож, эдэлж хэрэглэж, мэдрэх ёстой Хойд Солонгосын ард иргэд ардчилсан нийгмийн гол үзүүлэлт болсон хүний эрхээ дэндүү хатуугаар зөрчүүлж байгаа гэхэд хилсдэхгүй. Гэхдээ Хойд Солонгосын шинэ удирдагч, гурав дахь Ким өөрчлөлт хийх гэж байгаа ажээ.

Өвөө Ким Ир Сен, аав Ким Чен Ир нарыгаа залгамжлан хаалттай, хатуу чанд дэглэмтэй Хойд Солонгос улсыг удирдахаар болсон Ким Чен Ун ард иргэддээ зориулж, шар айраг уух шар айргийн мухлаг, адреналин ялгаруулах арга замуудын нэг болох галзуу хулгана /roller coaster/-ууд барьж байгуулах ажилд зориулан мөнгө цуглуулж байгаа гэнэ. Магадгүй олон Хойд Солонгосчуудын дотор сэтгэлдээ нууцхан хүсэн хүлээж байгаа эдгээр газруудыг барьж байгуулахыг эсэргүүцэх хүмүүс байж болох ч хэдэн жилийн дараа Хойд Солонгосчууд дураараа шар айраг шимж, галзуу хулгана дээр цагийг өнгөрүүлэх боломжтой болох бизээ гэж итгэж байна.