“Тэнгис”-ийн хэмээх шинэ хэрэг

Манай  нийслэлд  хүү­хэд залуус чөлөөт цагаа  өнгөрөөдөг газар гарын арван хуруунд тоолог­до­хоор цөөн бий. Ард­чилал эхэлсэнээс хойш хүүхдүү­дийн гэсэн юм бүхний зориулалтыг нь өөрчлөн баар, дэлгүүр бол­­гож бай­лаа. Энэ түү­хийг бидний сайн мэдэх “Ялалт” кино театр ч давт­сан  юм. Ний­гэм солигдох үеийн давал­гаанд өртсөн  нийслэлийн өм­чийн  кино  театрыг нэг хэсэг зориу­лалтын бусаар тү­рээсийн  байгууллагуу­дад ашиг­луулж байсан.  Харин  2003 оноос “Улаан­баатар Синема” хэмээх шинэ ком­пани байгуулж, солон­госуудтай  хамтран  “Ялалт”-ыг шинэчилж “Тэн­гис” болгон  өөрчил­сөн нь одоо сөхөгдөж  эх­лээд буй нэгэн шинэ  хэр­гийн түүхийн эхлэл  бол­жээ.

Бидний  аав, ээж, ах, эгч нарын  залуу насны дурсамжаа үлдээсэн дээрх  театр   анх  баригдсан цагаасаа хойш 100 хувь  нийслэлийн  өмчид  бай­жээ. Харин  2003 онд  кино театрыг  сэргээн  засвар­лахдаа 66 хувийг нь  со­лонгосуудад  зүгээр л  өг­чихжээ   гэж өдгөө нийс­лэлийн удирдлагад  байгаа  хүмүүс шогширч  сууна. Залуус кино үзэх ч театр­гүй  байсан  үед “Ялалт”-ыг аварсан  солонгосуудад баярлаж байсан  хүн  олон  байв.  Одоо  бол  тус театр  жилдээ  800  мянган хүнд  үйлчилдэг, кино  үзвэрийн  хамгийн  сүүлийн  үеийн  техникээр  тоноглогдсон үзвэрийн гурван танхим­тай болсон  юм.

Нийслэлийн  эзэмш­лийг 34  хувьд  хүртэл  бууруулсан  хувьчлалын  түүхийн талаар хотын Өм­чийн харилцааны газрын дэд  дарга Т.Батдорж “Одоо­гийн  Тэнгис кино  театрын  хувьчлал гэж хэдэн  жилийн өмнө  их  сонин  зүйл болсон  байдаг.  Хотын  100  хувийн өмчийн  дийлэнхийг гадныханд зүгээр л  “Май” гээд өгчих­жээ.  Тэгээд хотын  эзэмшлийг  34  хувь  бол­гож, солонгосуудад 66  хувийг нь  эзэмшүүлж. Гэтэл  нөгөө Солонгосын  компани нийслэлийн өм­чид  хөрөнгө оруулчихаад Монголын хөрөнгө оруу­лалттай  нэгэн  компанид эргүүлээд  66  хувиа  зүгээр л  бэлгэлчихэж. Үүний  цаана нэг  юм байна. Энэ хувьчлалыг шалгах  Аж­лын хэсгийг  удахгүй бай­гуул­на. Бид  эхний  ээл­жинд хотын  эзэмшлийн хувийг 51 хувьд  хүргэ гэж шаардана”  хэмээн  ярилц­лага  өгчээ.

Түүний ярьснаас  үзэ­хэд  нээрээн  л  өчнөөн  тэрбум  төгрөгийн хөрөнгө  оруулалт хийсэн  театраа бусдад  зүгээр  өгсөн  бол энэ их  хачирхалтай  хэрэг  байж  таарна. Ямар  тохи­ролцоо, ямар  наймаа  бай­сан  болоод 66 хувийн  эзэмшлийг авч  чадсан солонгосууд  театраа  бус­дад  зүгээр өгөв гэдэг  нь олон  хүний  анхаарлыг татах  нь  мэдээж  юм. Өмч  хувьчлал гэдэг  нэрийн  дор цөөн хүн  нийтийн  өмчийг завшдаг хэргийн нэгэн  түүх “Тэнгис”-т  давтагдсан  бололтой.  “Ялалт”  буюу  “Тэнгис”-ийг өдгөө “Улаанбаатар Синема”  компани эзэмшиж байгаа. Харин өөр эх сурвалжийн  мэ­дээл­лээр  бол  солонгосууд театрыг  зүгээр бэлэглээ­гүй, зарсан.  Театрын  66  хувийг  эзэмшдэг  компа­нийг нь  Г.Батхүү, Сү.Бат­болд  нар групп компаниа­раа дамжуулан худалдаж авсан  хэмээж  буй  юм. Энэ бүхнээс  одоо нэг зүйл тодорхой болжээ. Энэ бол  “Тэнгис”-ийн хувьчлал­тай  холбоотой нэгэн шинэ  хэргийн түүх  эхлэх болсон  явдал  юм. Мэдээж  хэр­гийн эзэн  холбогдогч нь тухайн үеийн хотын удирд­лагууд, өндөр  албан тушаал  хашиж  байсан  одоогийн  МАН-ын том­чууд байх  бололтой.  “Тэн­гис”  хэмээх нэгэн бай­шин­гийн түүх нэг  хэсэг­тээ  олны  анхааралд  байх нь тодорхой  болжээ.