Гацууртын ордыг анхны хэлэлцүүлгээр батлахыг дэмжлээ

Сэлэнгэ аймгийн Мандал сумын нутаг Ноён уулын орчим байрлалтай Гацууртын ордод төрийн эзэмшлийн хувь хэмжээ тогтоох тухай УИХ-ын тогтоолын төслийг анхны хэлэлцүүлгээр батлахаар санал нэгдлээ. Тус ордод хувь эзэмших тогтоолын төслийг Засгийн газраас өмнө нь хоёр удаа өргөн барьсан ч гишүүдийн дэмжлэгийг хүлээж чадалгүй буцаагдсан билээ. Улмаар Засгийн газраас дахин оруулж ирснийг өчигдөр хуралдсан Эдийн засгийн байнгын хорооны хуралдаанд оролцсон гишүүдийн олонх анхны хэлэлцүүлгээр батлахаар санал нэгдсэн нь энэ. 50 тн алтны нөөцтэй Гацууртын үндсэн ордын ашиглалтын тусгай зөвшөөрлийг “Сентерра гоулд Монголиа” компани эзэмшдэг. Засгийн газрын зүгээс тусгай зөвшөөрөл эзэмшигч компанитай ярилцсаны үндсэн дээр Гацууртын орд дахь төрийн эзэмшлийн хэмжээг Ашигт малтмалын тухай хуульд заасан дээд хязгаар болох 34 хувиар тогтоож, уг хувь хэмжээг ашигт малтмалын нөөц ашигласны тусгай төлбөрөөр орлуулах шийдэлд хүрчээ.

Уул уурхайн сайд Р.Жигжидийн тайлбарласнаар уг ордыг ашигласан нөхцөлд Монгол Улс рояалтын гурван хувийн татвар авах буюу 432.3 тэрбум төгрөг орлогыг төвлөрүүлэх гэнэ. Энэ нь нийт ашгийн 68.2 хувьд оногдоно гэсэн урьдчилсан тооцоо гарчээ. Үүнээс гадна жилд таван тонн алтыг Төв банкинд тушаах тохиролцоонд хүрсэн байна. Ингэхдээ своп нөхцөлөөр тушаасан нөхцөлд 189 сая ам долларын орлого бүрдэх аж. “Сентерра гоулд Монголиа” компанийнхан Гацууртын ордоос 9-10 жил алт олборлох болон боловсруулах үйлдвэрлэл явуулахаар төлөвлөжээ. Энэ хугацаанд нийт хөрөнгө оруулалтын зардалд 215.9 сая, үйл ажиллагааны зардалд 1026.2 сая зарцуулах аж. Харин 1769,2 сая ам.долларын борлуулалт хийж, 433,6 сая ам.долларын татвар, төлбөр, хураамж төлөхөөс гадна 1000 орчим ажлын байр бий болох урьдчилсан тооцоог гаргажээ.

ҮНДЭСНИЙ ШУУДАН