Гадаадад байгаа монголчууд санал өгөхөд бэрхшээл үүсчээ
УИХ-ын Төрийн байгуулалтын байнгын хорооны өчигдрийн хуралдаанаар Орон нутгийн хурлын сонгуулийн тухай хуульд нэмэлт, өөрчлөлт оруулах тухай хуулийн төслүүдийн нэгтгэсэн төслийн анхны хэлэлцүүлгийг хийх байсан ч чадсангүй. Түүнчлэн цахим үнэмлэх хугацаандаа тарааж амжихгүй гэсэн мэдээллийг Хууль зүйн сайд өгсөн учраас АН-ын дарга Н.Алтанхуяг, ХЗДХ-ийн сайд хоёрын дунд ширүүн маргаан өрнөлөө. Н.Алтанхуяг дарга “Нямдорж оо, чи бууны нохой шүү дээ. Чи сонгуулийн булхай хийх гэж сайдынхаа суудалд үлдсэн” гэсэн бол Ц.Нямдорж сайд “Чи тийм юм бол Засгийн газартаа байж байхгүй яасан юм” гэчихэв.
Харин Н.Алтанхуяг “Чамд хайртайдаа МАН-ынхан авч үлдсэн гэж бодож байгаа бол битгий горьд” гэх зэргээр нэлээд удаан хэрэлдлээ. Ширүүн уур амьсгал дунд өрнөсөн байнгын хорооны хуралдаан Гадаад дахь монголчууд Дипломат төлөөлөгчийн газраа очиж сонгууль өгөхөд хүндрэл үүсээд байгаа асуудлыг хэлэлцэхэд хэрүүл намжиж, гишүүд хэлэлцэх асуудалд анхаарлаа хандуулж эхлэв. УИХ-ын Сонгогчдын нэрсийн жагсаалт бүртгэлийн хяналтын дэд хорооны дарга З.Энхболд гадаад дахь монголчуудыг УИХ-ын сонгуульд оролцуулахад мөрдөх батламжийг ГХЯ, СЕХ-ны дарга нар хамтран гаргасан талаар уншиж танилцуулаад, санал өгөхөөр хоёр удаа Дипломат төлөөлөгчийн газар ирэх нь зардал чирэгдэл их гаргах сөрөг талтай гэдгийг тайлбарлаад энэ заалтыг өөрчлөх шаардлагатай гэсэн санал гаргалаа. Тухайлбал, АНУ-д гэхэд Монгол Улсыг төлөөлсөн Дипломат төлөөлөгчийн газар ердөө хоёр хотод л байдаг аж.
Нэг нь Сан-Франциско, нөгөө нь Вашингтон. Тэгтэл Нью-Иорк, Чикаго зэрэг хотод монголчууд олноороо амьдардаг, тэдгээр иргэд сонгуульд оролцохын тулд эхлээд бүртгүүлнэ, дараа нь саналаа өгнө гэж дахин Дипломат төлөөлөгчийн газраа ирнэ. Асар том нутаг дэвсгэртэй АНУ-д автомашинаар явна гэвэл цаг алдана, тиймээс онгоцоор нисэхээс аргагүй. Энэ тохиолдлыг бодохоор монгол иргэд онгоцоор хоёр дахин нисэх шаардлага бий болно. Ийм бэрхшээл зөвхөн АНУ-д амьдарч байгаа монголчуудад тохиолдоод буй юм биш, Англи зэрэг улсаас эхлээд нэлээд хэдэн улсад бэрхшээл үүссэн юм байна. Энэ асуудалд гишүүд өөр өөрсдийн байр сууриа илэрхийлж өмнө нь Иргэний шинэчилсэн бүртгэлд хамрагдчихсан бол шууд санал өгөх өдрөө ирээд бүртгүүлээд саналаа өгч болохоор, хэрвээ бүртгэлд хамрагдаагүй бол заавал Монгол Улсдаа бүртгүүлж байж санал өгөх талаар ярилцлаа. Байнгын хорооны дарга Ж.Сүхбаатар “СЕХ, ГХЯ Сонгуулийн тухай хуульд заасан заалтын дагуу журмаа баталчихсан байхад, дахиад өөрчлөх нь тогтворгүй байдал үүсгэнэ. Монголбанк болон бусад байгууллага шиг үүрэг чиглэл өгдөг байгууллага биш” гэсэн тайлбар хийлээ.
АН-ын бүлгийн ахлагч Ч.Сайханбилэг “Хууль батал гэж биднийг суулгадаг. Хуулиас дээгүүр гарсан шийдвэр гаргачихаад байхад наадхаа зас гэж хэлэх эрх байхгүй болж байна уу. Бид зайлшгүй гэж үзвэл шаардах, үүрэг өгөх эрхтэй” хэмээгээд ам ажил хоёр нь үргэлж зөрж байгааг шүүмжиллээ. Гадаад дахь монголчууд УИХ-ын сонгуульд саналаа өгөхийн тулд хоёр удаа Дипломат төлөөлөгчийн газраа очих уу, эсвэл нэг удаа юу гэдгийг журам баталсан ГХЯ, СЕХ энэ асуудлаар дахин хэлэлцэх болсноор байнгын хорооны хуралдаан өндөрлөв.
Б.Өнөртогтох
URL:
