Голлох суурь металлуудын үнэ уналаа

Голлох суурь металлуудын үнэ унаад байна. Тухайлбал: зэсийн үнэ таван сар дараалан унаад байгаа нь 2008 оны санхүүгийн хямралаас хойших хамгийн удаан хугацаанд үргэлжилсэн уналтад тооцогдож байна.

Суурь металлын хэрэглээгээр тэргүүлэгч БНХАУ 21 сая хүн амтай Чэнду хотод COVID-19-ийн халдварын тархалтын улмаас хатуу хөл хорио тогтоосон нь үнэ унахад голлон нөлөөлжээ.

Мөн Европт эрчим хүчний хямрал үүсэж, АНУ-ын Холбооны Нөөцийн банк мөнгөний бодлогоо чангаруулж, БНХАУ COVID-19-ийг үл тэвчих бодлогоо үргэлжлүүлж байгаа нь суурь металлуудын эрэлтэд сөргөөр нөлөөлөхөөр байна. Ийнхүү эрэлт буурах төлөвтэй болсноор нийлүүлэлт ч мөн адил саарч байгаа аж.

Тухайлбал: дэлхийн нийт зэсийн гарцын дөрөвний нэгийг дангаар хангадаг Чили улсын зэсийн гарц долоодугаар сард өнгөрсөн оны мөн үеэс 8.6 хувиар буурчээ. Одоогийн байдлаар Лондоны Металлын биржид зэсийн үнэ 1.5 хувиар унаж, тонн нь 7682 ам.доллар боллоо.

Харин цайрын үнэ 6.8 хувиар унасан нь гуравдугаар сараас хойш хамгийн өндөр дүнгээр унасан тохиолдол болж байна.

Ц.Бадмаараг

Bloomberg Tv