Хамгийн сүүлчийн авлигач оймсоо тайлахад…

5523

Хамгийн сүүлчийн олигарх ордноос явахад
Хамгийн сүүлчийн луйварчин төрөөс зайлахад
Хамгийн сүүлчийн хуйвалдагч хэргээ хүлээхэд
Хамгийн сүүлчийн авлигач оймсоо тайлахад
Монгол төр жолоо юугаа талбиж
Монгол түмний сэтгэлд оч асна

Хамгийн сүүлчийн биеэ үнэлэгч сэтгүүлзүйгээс арчигдахад
Хамгийн сүүлчийн долоогч төрийн албанаас хөөгдөхөд
Хамгийн сүүлчийн хөлсний жагсагч гэртээ өнжихөд
Хамгийн сүүлчийн сандлын наймаачин ажлаа өгөхөд
Монгол төр суудал юугаа засч
Монгол түмний зүрхэнд гэрэл асна

Хамгийн адгийн шуналтан нүгэлдээ бүдрэхэд
Хамгийн адгийн ховдог харийнхны хоолонд хахахад
Хамгийн адгийн худалч хэлсэндээ бүдрэхэд
Хамгийн адгийн хулгайч хумсалснаа буцаахад
Монгол төр ташуур юугаа өргөж
Монгол түмний итгэлд гал асна

Хамгийн анхны баян ба ядуу нүцгэн учрахад
Хамгийн анхны хаан ба харц номын санд уулзахад
Хамгийн анхны шүүгч хараа хяналтгүй алхаа цохиход
Хамгийн анхны хувьдаа бизнесгүй ерөнхийлөгч сонгогдоход
Монгол төр цулбуур юугаа чангалж
Монгол түмний нуруу амсхийнэ.

Хамгийн эхний хүрз нүүрс харууслын нулимсгүй ачигдахад
Хамгийн эхний тендэр бохир будлиангүй хуваарилагдахад
Хамгийн эхний улстөрч гэмээ хүлээн огцроход
Хамгийн эхний яам хүн-бохироо цэвэрлэхэд
Монгол төр сүлд юугаа өргөж
Монгол түмэн төр юугаа дээдэлнэ

Хамгийн анхны сум боловсон жорлонтой болоход
Хамгийн анхны аймаг даргаа зодоонгүй сонгоход
Хамгийн анхны хөрөнгө оруулагч шударга гэрээ үзэглэхэд
Хамгийн анхны сайд ах дүүсээ албанаас чөлөөлөхөд
Монгол төр эмээл юугаа сойж
Монгол түмэн эгэм юугаа амраана.

Хамгийн сүүлчийн жаран тэрбумтан суудал уруудахад
Хамгийн сүүлчийн жалганы үзэл өр нухахаа болиход
Хамгийн сүүлчийн бандаашгүй гишүүн амбицаа татахад
Хамгийн сүүлчийн ёс зүйгүй үеийнхэн тэтгэвэртээ гарахад
Монгол төр тэргүүнээ өргөж
Монгол түмний оюун амсхийнэ.
Р.ЭМҮЖИН.2019.08.15.


URL:

Нэр: юмжав Огноо: 17 August 2019

Гоё яг үнэн. хурдлуулмаар байна. болохгүй бол хүйс тэмтэрчээсээ дээрх луйварчдыг бүгдийг бурхан минь

Сэтгэгдэл бичих