БНХАУ хиймэл оюуны салбарт АНУ-г тэргүүлнэ

БНХАУ хиймэл оюун ухааны салбар дахь өрсөлдөөнд АНУ-г ялна. Хятадын хиймэл оюун ухааны салбарын төрийн оролцоо бага бөгөөд цахилгаан эрчим хүчний илүү бага зардал нь тус улсад давуу байдлыг олгож байна гэж Nvidia компанийн ерөнхий захирал бөгөөд үүсгэн байгуулагч Женсен Хуанг мэдэгджээ.

Түүний хэлснээр, БНХАУ-д “үнэгүй эрчим хүч” татаас олгодог бол АНУ-д хиймэл оюун ухааныг зохицуулах шинэ дүрмүүдийг гаргасаар байна. АНУ-ын ерөнхийлөгч асан Жо Байдены засаг захиргааны үед АНУ-ын компаниудад дэвшилтэт процессорыг Хятадад нийлүүлэхийг хориглож байсан. Энэ салбарт тэргүүлэгчдийн нэг Nvidia компани Хятадын компаниудын шаардлагад нийцсэн тусгай бичил схем боловсруулжээ. Гэвч Бээжингийн зүгээс эдгээр чипийг ашиглахгүй байхыг Хятадын компаниудад уриалсан байна.

The Financial Times хэвлэлд бичсэнээр, Женсен Хуанг АНУ-ын ерөнхийлөгч Доналд Трамптай уулзах үеэр Хятадын чиглэлд авсан эл хязгаарлалтыг цуцлах хүсэлт тавьсан. Түүний ярьснаар, Америкийн хиймэл оюуны шинэ загварууд Хятадын загваруудыг тэргүүлж байгаа бөгөөд эл байр сууриа дэлхийн зах зээл дээр хадгалахын тулд АНУ-ын эрх баригчид хязгаарлалтуудаа цуцлах шаардлагатай байна. Энэ тохиолдолд бусад улс орнууд Америкийн технологиос хараат байх болно гэж Хуанг онцолсон байна.