Хонконг: Нэг жагсагч өндрөөс унаж амиа алджээ

1_bЛхагва гаригийн орой Хонконгийн нэгэн дүүрэгт хар хувцастай залуу хүний цогцос олджээ. Урьдчилсан мэдээллээр залуу өндрөөс унаж амиа алдсан байна. Түүний унасан шалтгаан болон хэргийн нөхцөл байдлын талаар тодруулахаар ажиллаж байгаа гэж Хонконгийн цагдаагийн газар мэдэгджээ.

ТАСС агентлагийн мэдээлснээр, амиа алдсан эр хар хувцастай байсан нь эсэргүүцлийн ажиллагааны оролцогчдын нэг байсан байж болзошгүй гэсэн таамаглалд хүргэж байгаа аж.

Эргэн сануулахад, эх газрын Хятад руу сэжигтэн шилжүүлэх тухай хуулийн төслөөс үүдэлтэйгээр Хонконгод зургаадугаар сараас эхлэн олныг хамарсан эсэргүүцлийн жагсаал эхэлсэн.

Улмаар хуулийг эргүүлэн татсан ч Бээжингийн зүгээс хяналт чангарч байгааг эсэргүүцэн жагсаал цуглаан үргэлжилж, эмх замбараагүй байдал газар авсан юм.

Тус хотын цагдаагийн газрын мэдээлснээр эсэргүүцэл эхэлсэн зургаадугаар сараас хойш баривчлагдсан хүмүүсийн тоо 4000 давсан бөгөөд тэдний 40 хувь нь оюутнууд байгаа аж.

Сүүлийн өдрүүдэд жагсагчид тээврийн салбарыг гацаанд оруулж, авто зам болон трамвайн шугмууд дээр хаалт босгосны улмаас автобус, трамвайн хөдөлгөөн саатсан байна. Улмаар их дээд болон дунд сургуулиудын үйл ажиллагааг түр хугацаанд  зогсоосон байна.


URL:

Сэтгэгдэл бичих

АНХААРУУЛГА: Уншигчдын бичсэн сэтгэгдэлд FACT.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 9318-5050 утсаар хүлээн авна.