Монгол бичиг

 Манай үе үеийн зохиолч уран бүтээлчид төрөлх эх хэлээ магтан шүлэг найраг бичсэн нь цөөнгүй. Б.Ринчен гуай гэхэд “Чихинү чиэг болсон аялгуу сайхан монгол хэл, Чин зоригт өвөг дээдсийн минь өв их эрдэнэ…” гэхчилэн бичиж үлдээсэн нь бий. Тэгвэл энэ цагт уран бүтээлээ хийж яваа зохиолч, сэтгүүлч Б.Ойдов өөрийн нүүр номондоо энэхүү шүлгээ постолжээ.

МОНГОЛ БИЧИГ

Хана хэрэм шиг ханз үсгийн голоор

Хага цохин цуулах “хадаас” бичиг минь

Хана хэрэм шиг ханз үсгийн дээгүүр

Харваж давуулсан шат шиг босоо бичиг минь

Хана хэрэм шиг ханз үсгийн нуруунд

Хаваж шаасан сум шиг хангал бичиг минь

Хана хэрэм шиг ханз үсгийн цээжинд

Хадаж сийлсэн шүлэг шиг монгол бичиг минь

Аянгын утга, хурмастын лүндэнг өөртөө шингээж

Аадрын үүлнээс газар луу харвасан тэнгэрийн цахилгаан юм та

Ааг омгоо багтааж ядсан талын зэрлэг нүүдэлчдийг

Атгаж цуглуулаад Азийн төвд хатгасан алтан гадас юм та

Хөх толбот Монгол үрсийнхээ амьдрах цаг хугацааг

Хүй ургаар нь агуулж хадгалсан тэмдэглэгээ юм та

Огторгуйн хязгаар, хээрийн салхинд бүрэлдсэн гоц санааг

Ойртуулан хурааж орон зайг товчилсон ойллого юм та

Хүн, Сүмбэ, Нирун гүрний дээдсийн

Хөшөө чулуунд үлдээж чадаагүй бодол нь юм та

Уйгар, Түрэг, Кидан өвгийн хаадаас

Уураг тархиа хуулж шингээсэн зардас нь юм та

Мөнх тэнгэрээс газар эх рүү унжуулж барьсан хулсан ташуур

Мөрөн голын галбир дуурайж мушгирсан суран цацлага

Өөдөө дүрэлзэх галын тулганаас угалзарч цацарсан дөл

Өвөг дээдсийн минь мянган жилийн шастир та түмэн жил орштугай!

Хана хэрэм шиг ханз үсгийн голоор

Хага цохин цуулах “хадаас” бичиг минь

Хана хэрэм шиг ханз үсгийн дээгүүр

Харваж давуулсан шат шиг босоо бичиг минь

Хана хэрэм шиг ханз үсгийн нуруунд

Хаваж шаасан сум шиг хангал бичиг минь

Хана хэрэм шиг ханз үсгийн цээжинд

Хадаж сийлсэн шүлэг шиг монгол бичиг минь

Б.ОЙДОВ


URL:

Нэр: 11111 Огноо: 21 January 2016

Ханз үсгээс гадна өөр олон үсэгийг хага цохисон тухай бичих байжээ. Ганцхан Ханзруу дайрсан юм шиг болсон байна

Нэр: 22222 Огноо: 22 January 2016

Hanz tom soyol shuu dee. Yahaaraa iim hudgiin melhii shig baidag bnaa

Нэр: Anonymous Огноо: 25 January 2016

Nasandaa unshaagui tenet shuleg be sail tsaashaa.

Сэтгэгдэл бичих